Diasabra atardi alrededor di 5:00 pm polis a presenta na un adres na Sero Janchi p’un problema di pareha. Bisiñanan a scucha grito y no a bacila den avisa autoridad pa activa mesora pa evita lo peor. Parce cu e homber a agredi su pareha malamente.
Na yegada di polis a constata cu berdad e pober señora a haya hopi sla y tabata cla pa entrega keho contra esun cu un dia a primintie di lo ta e amor di su bida y di lo stim’e incondicionalmente. Ta parce cu e amor a comberti den rabia y constantemente, kisas pa influencia di alcohol, ta cambia den agresion fisico.
Polis a dicidi pa detene e sospechoso mesora na e sitio. Cu su mannan den boei a hib’e den van di polis, pa por transport’e pa un ward’i polis. Ey lo present’e dilanti un subfiscal, cu lo dicidi riba su encarcelacion.
Pa awo, e homber abusado aki lo permanece encarcela. Pero, ta bon pa subraya cu si no entrega keho, e no ta keda cera. Lamentablemente den mayoria caso e hende muhe ta opta pa no entrega keho y consecuentemente e homber ta sali y … hopi biaha ta yega cas y maltrata e pareha atrobe. E factor cu mayoria biaha ta hunga un rol ta cu e pareha tin yiu of e cas ta di e homber, e auto of e muhe ta depende financieramente di e homber. Y hopi biaha, pa cosnan di mundo, ta opta pa toch wanta sla, basta cu nan tin un dak riba nan cabes.
