Accidente cu persona bou di influencia a bira pan di tur dia den trafico. Practicamente tur dia polis ta atende cu e tipo di susedidonan aki y awe no ta diferente.
Polis a presenta pa un accidente den Van Walbeekstraat caminda cu e chauffeur a dal un auto, a drenta cas y no kier a atende cu personal di Forensys na sitio. Segun por a compronde cu e persona lo ta biba na dicho cas. Tur eski a sosode aproximadamente 2:30 pm den e caya net patras di warda di polis na Playa.
Na yegada a constata cu berdad e auto a ricibi basta daño pero cu e sla na e vehiculo no ta cuadra cu e situacion cu nan ta presenciando na e momento ey. E otro auto no tabatin asina tanto daño na dje. A cuminsa cu averiguacion y a bin resulta cu e auto aki tabata envolvi den un otro accidente, un hit and run, cu a tuma luga den Windstraat. Segun habitantenan, e persona lo ta bastante bebi.
E dicho chauffeur lo a pasa dal un otro auto y bandona sitio. A tuma tur datos na sitio pero no a detene e chauffeur en cuestion.
