Den su funcion como polis, Otniel D’ Aguiar di 39 aña di edad, naci na Corsou pero cu a bay scol y a bira polis na Aruba, awe e ta un heroe na nos isla bisiña. Corantnan na Corsou tin e riba portada principal y hasta minister-president di Corsou awe a elogia e polis aki pa su acto heroico.
Otniel D’Aguiar a brinda su servicio incondicionalmente na e Cuerpo Policial di Aruba y awo ta haci e esaki cu tur honor, desde dos aña pasa, na Cuerpo Policial di Corsou. D’ Aguiar a gradua den Korps Politie Aruba for di klas 2013. El a traha como polis uniforma na ward’i polis di Oranjestad, despues a traha como polis motorisa y por ultimo tabata recherche na ward’i polis di San Nicolas. For di ey, el a traslada y a bay biba y traha na Corsou. Dia 30 di november 2019 a sali for di Cuerpo Policia Aruba y ta forma parti di Cuerpo Policial di Corsou na warda d’i polis Rio Canario.
E siman aki a habri cu noticia heroico y cu a encabesa corant como portada, e rescate cu a tuma luga na Kwartier. Un criatura di dos aña a cay den un pool na su cas y a activa tur autoridad mesora. Un di e polisnan cu a presenta na sitio tabata Otniel D’ Aguiar, cu den forma sereno a tuma control di e situacion. Su procedura y liderazgo tabata factor principal den esfuerso pa salba bida di e criatura. A suministra C.P.R (reanimacion) pa salba e criatura y mantene na bida. Tin di menciona cu e acto heroico aki a bin danki na estudio y preparacion, hunto cu curso di EHBO cu a ricibi durante su estudio na scol di polis aki na Aruba.
Esaki tabata un esfuerso den ekipo, ta locual cu D’ Aguiar a duna di conoce den un publicacion riba red social. El a gradici su coleganan di Cuerpo Policial di Corsou cu a bringa hunto pa rescata e criatura aki. Tambe el a duna di conoce cu den su trabou el a yega di topa cu hopi scenario pero cu esun aki en particular tabata prome biaha. Como polis bo ta haya bo enfrenta cu desicion di bida of morto y esaki tabata un di nan. E ta parti di bo trabou como polis pero como ser humano y como tata cu ta stima su yiunan, e ta un momento hopi dificil.
Otniel D’Aguiar ta gradici Dios tambe cu a pone man riba dje y su coleganan pa asina por a salba bida di e criatura aki, pa a keda trankil y por a suministra reanimacion te na momento cu paramedico riba ambulance a yega na e sitio y a tuma e trabou over.
D’Aguiar no ta un persona cu ta tuma elogio pa su mes, pero ta remarca cu ta un esfuerso di ekipo a pone cu awe tin un criatura na bida y cu e comunidad por ta trankil cu polis lo t’ey na cualkier momento cu yama nan pa presenta y brinda servicio cu amor y conviccion.
Ta bon pa menciona acerca cu Prome Minister y alabes Minister di Husticia di Corsou, esta Gilmar Pisas, tambe a tuma nota di e acto heroico cu a tuma luga cu e polis dia 20 di februari 2022. Prome Minister a aplaudi e actuacion rapido aki y heroico di parti di e polis. “El a proteha y sirbi manera debe ser. “Bo por ta orguyoso awe cu abo a yuda pa skcapa bida di un ser humano. Corsou ta orguyoso di bo. Na nomber di Gobierno di Corsou, danki pa e bon trabou cu bo a desplega”, asina e prome mandatario a duna di conoce.
Hopi biaha polisnan sa haya nan mes den problema y mesora esey ta acapara atencion. Comunidad ta spera di nan pa ta un bon ehempel y pa cumpli cu e mesun leynan cu nan ta defende y aplica riba otro tur dia. Pero, tin biaha ta bon tambe pa para un rato keto na e trabounan heroico cu nan ta eherce tur dia, tin biaha poniendo nan mesun bida na peliger, pa por salba di otro. Pabien Otniel.. bo ex-coleganan di Cuerpo Policial di Aruba ta hopi orguyoso di bo.
