Joaquin van Trigt ta dokter di cas y presidente di HAVA (Asociacion di dokternan di cas) y el a duna un discurso den Parlamento. E topico di mes ta riba coronavirus. Awor aki tin un situacion mundial unda cu coronavirus ta bezig ta plamando. E no a yega Aruba ainda, pero pa e momento cu e mester yega, nos tur mester ta prepara, incluyendo e prome liña, esta e dokternan di cas.
Segun dr. van Trigt, e punto ta pa educa e poblacion di Aruba riba kico ta importante pa haci pa preveni cu coronavirus por plama. E ta bay yega, pero e momento cu e yega Aruba, “nos mester tur haci nos best pa evita pa e virus sigui core rond y nos yega den un situacion cu nos ta wak na China of na Italia, cu tin problemanan grandi pa tanto e ambiente di salud pero tambe pa nos economia.”
Con bon Aruba ta prepara
E prome liña, manera cu dr. van Trigt ta prepara. E ta sigui splica cu ta haya cu Aruba ta hopi bon prepara. Tin un adelanto, door cu e no a yega ainda y ta bezig ta prepara caba cu e virus drenta y tin un paar di cos cu ta palabra entre tur e stakeholdernan.
HAVA por ehempel ta dialoga tur siman, por lo menos dos biaha cu hospital y tambe cu DVG. Awo tambe cu SVb riba e medidanan cu tin cu tuma. A dicidi di pone un hotline disponibel unda cu tur hende por yama riba e number aki y por puntra si tin pregunta riba coronavirus.
Importante ta en berdad pa e number ta disponibel y no bay dokter di cas su oficina pasobra eynan bo ta pone na riesgo tur e empleadonan como tambe e pashentnan cu por wordo contagia. Y asina e plamamento ta cuminsa. “Por fabor, si bo ta malo, keda cas, yama e hotline of yama bo dokter di cas pa e informacion corecto y lo bo wordo dirigi exactamente na unda bo mester bay pa si tin un caso sospechoso di coronavirus.”
Plan di contingencia
Dr. van Trigt a splica tambe cu HAVA a palabra cu si mester pasa cu un colega mester bay den isolacion pasobra el a wordo contagia cu e virus, su practica lo mester wordo cera temporalmente. Cada dokter di cas tin mas cu 2000 pashent. E ora ey HAVA nan 48 dokternan di cas a dicidi cu lo tin un backup cu lo parti e pashentnan den tur dokter di cas, pa e cuido keda continuo y accesibel pa tur pashent si en caso cu un praktijk wordo cera temporalmente.
