Awe merdia a HAVA a manda un carta dirigi na tur dunado di cuido relaciona cu e medidanan cu nan lo tuma y anuncia pronto contra AZV. Adhunto a manda un splicacion amplio riba ken nan ta y con nan trabou ta hinca den otro.
Ken ta HAVA? HAVA (Huisartsen vereniging van Aruba) ta e Asociacion di Dokter di Cas di Aruba. Tur e dokternan di cas na Aruba ta wordo representa door di HAVA. Actualmente tin 48 dokter di cas na Aruba
Con oficina di dokter di cas ta traha?
E oficina di dokter di cas ta un compania chiquito riba su mes. E dokter di cas mester cumpli cu varios requisito manera ta wordo stipula den lei cu ta valido pa tur compania. Esaki kiermen cu e practica di dokter di cas ta paga huur of hypotheek di nan oficina, tambe ta paga coriente, awa, telefoon, diferente seguronan, SVB, KVK, pensioen, belasting, abogado, accountant, gastonan pa limpiesa, tur material
medico cual ta wordo usa den e oficina, muebles, salario di e dokter y e assistentnan. Tur esaki mester wordo paga for di e suma mensual cu e dokter di cas ta ricibi di AZV.
Loading…
Reload document
Open in new tab AZV
Manera ja ta conoci gobierno di Aruba a haña orden di Hulanda pa baha e gastonan di AZV cu 5 miyon florin pa luna. E exigencia aki a bin apesar cu Aruba ta pasando den un situacion hopi difisil door di e crisis causa door di covid-19. A pesar di varios intento door di HAVA y e stakeholders di otro sector di cuido pa sinta na mesa cu AZV y purba na jega na un manera responsabel di reduci gasto esaki no a logra. AZV a dicidi di djis corta entradanan di oficinanan di dokter di cas di tal forma cu no por cubri tur gastonan di operacion y personal
mas. Ademas AZV, sin anuncio oficial, unilateralmente a dicidi di implementa su medidanan cu ‘terugwerkende kracht’ cuminsando desde januari 2020. Esaki apesar cu den luna di januari, februari y maart no tawata tin un situashon di crisis y tampoco tabata existi e demanda for di hulanda pa e reducion di gasto di 5 miljon pa luna. E dokternan di cas kier ta solidario den e situacion di crisis cu ta reina pero nos no porta deacuerdo cu e medidanan manera cu nan ta wordo implementa paso esaki ta bai afecta e calidad di cuido drasticamente.
Pakiko?
Manera menciona dokternan di cas tin gastonan mensual halto. E medidanan tuma door di AZV ta causa un deficit grandi den entrada di e practica di e dokternan di cas. Esaki ta hasi cu e compania di dokternan di cas no tin of no ta resta suficiente fondo pa por cumpli cu tur e gastonan di oficina of cu salario di e empleadonan. Si no por cumpli cu e gastonan di oficina of no por paga e assistentnan dokternan di cas no por garantisa e cuido mas na nos patientnan. HAVA ta di opinion cu cuido primario, awo mas cu nunca, ta un di e sectornan esencial cu aworaki mester juist extra fondonan pa por sigui brinda e cuido necesario den tempo di crisis.
Tambe nos kier menshona cu HAVA y otro dunadornan di cuido a presenta AZV cu alternativanan pa jega na e exigencianan cu Hulanda a pidi pero lamentabelmente AZV no a duna oido na esaki. Consequencia di e medidanan di AZV HAVA ta lamenta cu door di e medidanan nos no ta wak otro solucion cu tuma accion contra di AZV. Esaki ta nifica cu si AZV no reacciona positivamente riba nos peticion, dialuna 27 di juli tur oficina di dokter di cas lo ta sera pa publico. Pa casonan di emergencia por acudi na huisartsenpost (HAP) of spoedeisende hulp (SEH) na hospital. Orario di HAP ta di 9or di mainta pa 1or di merdia y di 6or di atardi pa 10or di anochi. Pa casonan di emergencia pariba di brug por acudi na oficina di drs M.Wever. HAVA ta spera cu no mester jega na escalacion y cu pronto cada praktijk por sigi traha cu su team completo na servicio di tur patient. Nos kier ta sincero cu nos no kier perjudica salud di nos patientnan pero pa manda un señal cla cu nos sistema di cuido mester atencion urgentemente.
