Recientemente gobierno di Aruba, bou representacion di Minister Glenbert Croes hunto cu e directornan di WEB, Elmar y Utilities a anuncia un proyecto di molina di biento pa San Nicolas. Tin cu remarca si cu; unda kier aloca e molinanan di biento aki, ta mas o menos 850 meter leu di cas di hende. Tin por lo menos un ciudadano cu no ta di acuerdo cu e anuncio aki. Esteban Koolman ta un ciudadano di Weg Fontein. El a keda masha sorprendi cu e anuncio di Minister Glenbert Croes relaciona cu e molina di biento. Koolman no ta di acuerdo cu e proyecto aki.
Pa prome, ningun hende a consulta e bario riba e proyecto aki. Ya caba e habitantenan di Weg Fontein y bisindario ta bibando cu e dies molinanan di biento na Vader Piet. Nan no kier mas molina cerca di nan cas.
Koolman a duna di conoce cu ora cu kier a bin cu un parke di molina di biento na Alto Vista, e habitantenan tabata masha disgusta mirando cu e balor di nan cas lo baha, e no ta bira dicon nan si di San Nicolas tin cu acept’e.
P’e proyecto nobo aki, ainda no a mira ningun representante di gobierno pa consulta cu e bario riba e anuncio aki. Na final Koolman a bisa cu: “Pabou si no a tum’e, anto dicon e buriconan di pariba si?”
