GUARDIAN GROUP FATUM ta celebra den luna di juli proximo 116 aña. E parti interesante di e aniversario aki ta cu 116 aña ta algo masha bunita y aña 2019 tabata un aña hopi bon pa e Compania. Di otro banda e ‘pandemia’, a consecuencia di e vírus di Corona, ta haci difícil pa nos celebra di e forma cu nos a custumbra y cu ta pas pa e ocasion.
Organisacion di eventonan manera p.e. Guardian Group Walk & Run na e cuater islanan pa aworakí no por tuma luga. Loke si ta pas ta pa yuda activo den e lucha contra e virus di Corona. Na nos isla tin hopi hende ta traha masha hopi ora pa dia, bou di guia di Minister President Evelyn Wever-Croes, den estrecho colaboracion cu Minister di Salubridad Publico, Dangui Oduber, e gabinete completo, servicionan di Gobierno, DVG y otro instancianan, pa evita cu e virus ta plama y economia por start atrobe.
Dialuna dia 11 di mei e team di maneho di Guardian Group Fatum Aruba a reuni via di un ‘Zoom – meeting, cu Minister President, Evelyn Wever-Croes, Director di CEDE Aruba y Coordinador di Happy to Give Back, Daniel Tecklenborg y FUTURA, Sra. Varelie Croes. Durante di e reunion digital aki, a pone un suma di 116 mil florin disponibel di un forma digital y simbolico, pa yuda cu e necesidadnan ariba tereno medico, como tambe social. Por ehempel reparticion di pakete di comestibel adecua pa esnan cu tin hopi mester di esaki. Guardian Group tin pleno confianza cu pa medio di CEDE Aruba (Happy to Give Back), continuidad di ayudo por sigui na esnan mas den necesidad y via FUTURA, e ayudo na nos Hospital y assistencia ariba tereno disalubridad publico cu ta primordial.
Banda di esaki ta evaluando otro eventual forma di yudansa cu por ofrece. “Guardian Group Fatum ta sigui desaroyonan relaciona cu COVID-19 hopi diserca y lo keda envolvi den actividadnan cu por yuda start nos economia di nobo. Danki na esfuerso grandi di hopi organisacion y voluntarionan nos ta mira futuro di nos pais positivo. Esaki danki na e hecho cu e communidad di Aruba ta uno cu ta cai, pero ta bolbe lanta para, segun Diego Fränkel, Presidente & CEO di Guardian Group Fatum.
