Accion a sigui diaranson ora cu e diferente departamentonan di gobierno a dicidi di tene un accion di un ora contra di recorte di 12.6% riba nan salario.
Guarda Costa tambe a uni nan mes na e causa, unda cu nan ta bisa cu nan comienso di pandemia nan a uni nan mes na e causa y entrega 12.6% di nan salario pa asina esunnan cu a perde trabou, toch por tin un entrada digno. Pero, tanto Loonsubsidie como Fase, a yega na su final na november ultimo. Ora cu e trahadonan a kere cu nan ta bay haya nan salario completo bek, esaki no tabata e caso.
Esaki a haci cu diaranson e trahadonan di Guarda Costa tambe a a uni na e paro nacional y a pone trabou abou pa un ora largo. Rudolf Koolman, shop steward, a indica cu nan a sali pa manifesta nan malcontento. Como tur empleado publico nan tambe ta sinti e efecto di e recorte ariba nan salario y diaranson nan a sali dicidido. A parti e grupo den dos, unda cu un parti a sali pafo y e otro a keda pa keda cuida nos frontera, pa tur cos cana manera mester ta. Segun Koolman, e grupo cu a keda ta solidario cu e causa. Nan tambe ta contra e recorte riba nan salario.
Guarda Costa no ta contra pa negocia, pero nan unico condicion ta pa gobierno elimina e recorte di 12.6% riba nan salario. Na prome instante nan a acepta pa yuda pa ta solidario cu e pueblo di Aruba, cu a biba den tempo nan insigur y nan ta kere cu si tin otro manera pa drecha e situacion financiero di pais Aruba.
Pa un cobertura mas amplio lesa e edicion di TREMPAN di mañan.
