“Ban dal un ronchi rond Aruba e weekend aki no”, asina Ryan de Jongh a bisa Angelo Kock diabierna ultimo via un yamada telefonico. Tres persona a sali diadomingo mainta 5:30 am riba kayak y dal un ronchi completo.
E ruta a dura diescuater ora largo, cu ta net 71.71 KM. Ta trata di Angelo Kock, Ryan de Jongh y Stefanie Nina Ekert cu a reta nan mes cu e challange aki. Pa Kock, esaki ta djis un “hak af” for di su “bucket list”.
Mientras cu pa de Jongh, ta un otro logra mas. Den pasado de Jongh a yeg’i kayak rond Corsou caba y su logro mas grandi; ta kayak di St. Maarten pa Corsou, esaki a tuma luga mas of menos diescinco aña pasa.
Pa futuro, ta planiando pa kayak for di Amsterdam, Hulanda pa Willemstad, Corsou, debi na e situacion di Covid-19, a cancel’e dos biaha caba. Pa Ekert, esaki ta su logra mas grandi, mirando cu, kayak no ta su area di experticio, pero e ta compaña su casa Ryan de Jongh den su aventuranan.
