Entrante diasabra ultimo algun protocol di Covid-19 a cambia, entre nan esun di actividad social na cas. A base di e regla anterior, por a ricibi te cu un maximo 25 persona na cas, contal nan keda pafo y te cu un maximo 10 persona cu por ta paden di cas. Esaki a crea oportunidad pa hendenan organisa fiesta, encuentro social, BBQ te cu un maximo di 35 persona.
En bista cu e casonan ta aumentando y e hecho cu e plamamento di virus awo ta ser considera “Widespread” y cu ta na cas hopi hende ta contagiando cu e virus, Crisis Team a dicidi pa no permiti mas fiesta y encuentro social na cas. Pues pa e motibonan menciona, fiesta y encuentro social cu antes tabata por a ricibi 25 persona pafo y 10 persona paden, no ta permiti mas; pues ta permiti 0 persona pa eventonan social na cas.
E excepcion cu tin ta pa bishita di famia of bishita di dunado di cuido y bishita di dokter. Ta pidi famia si pa aplica e reglanan di higiena y distanciamento social pa asina nan cuida esunnan mas vulnerabel den famia.
Tanten cu tin hopi hende cu ainda falta pa haya vacuna, mester sigui cuida pa no contrae e virus y evita mas plamamento. E siman aki ta sigui cu e operativo grandi di DVG “Ban Vacuna pa Aruba por Progresa” y ta spera mas di esunnan di 60 plus pa registra pa haya nan Vacuna. Tambe esunnan cu tin problemanan cronico di salud bao di 60 lo cuminsa haya nan vacuna.
