Den cuadro cu desaroyo economico di pais Aruba, nos a puntra mr. Geoffrey Wever, Minister di Asuntonan Economico si ta mira den tapara pa bishita algun otro pais den Latino America of kisas tambe Merca. Mirando cu tin mas mercado naturalmente unda cu comercio ta sosode.
Segun e mandatario, parti di gobierno di Aruba su maneho economico ta uzo di diplomacia economico. Dus ta busca den mercado cu ta haya tin algun interes. “Manera mi a menciona, nos a wak esun di Colombia manera uno importante cu nos ta kere tin oportunidad.”
Tambe comercio den Venezuela, y parti di e vision p’e aña aki ta e Investment Summit na Hulanda cual gobierno ta kere ta algo hopi importante mirando nos posicion den Reino y region Caribe. Semper Aruba tabata tin e deseo y vision pa bira un Hub di inversion. Di e forma ey segun minister Wever, ta purba stimula e parti ey pa medio di ilustra nan oportunidadnan na Hulanda.
“Nos tin diferente otro idea y plan pa amplia riba diplomacia economico, pero eseynan ainda ta den preparacion.” Merca ta uno cu ta keda interesante pero gobierno a scoge pa enfoca riba Hulanda. “Nos ta kere inversion den Reino ta hopi importante. E parti di inversion Mericano, durante añanan a yega hopi mas facil pa medio di cercania pero aworaki nos kier enfoca tambe riba desaroyo mas sostenibel.
Mi ta kere na Hulanda tin hopi expertisio y deseo riba e tereno aki,” segun Minister Wever. Esaki tambe ta cu e meta pa contribui na un miho relacion den Reino, un miho relacion comercial dentro di e paisnan den Reino.
E mandatario ta sigui na bisa cu tin otro vision economico comercial cu lo bay tuma luga ainda durante e gobernacion aki y ta cada biaha ta bay pa uno, despues bay over na organisa e siguiente. Gobierno ta contento di por conta cu ayudo y abilidadnan di ARINA cu ta e agencia di inversion bao departamento di Asuntonan Economico encarga cu ful e organisacion pa bay organisa un evento manera Esun cu ta bay haci na Hulanda pronto. Minister Wever: “Y tambe cu nos tin colaboracion cu Aruba Huis, e netwerk di VNO tambe y nan conocemento di e mercado comercial na Hulanda. Mi ta kere e biaha aki nos ta bay tin un bon impacto cu e Summit aki na Hulanda. Pa despues ora ta cla, tur hende descansa un rato y nos ta cuminsa preparacion pa otro vision comercial. Ora ta asina leu lo mi bay anuncia esaki.”
