Pa añanan largo Amsterdam Manor ta sinti e efecto di holo stinki y musca causa pa e planta di purificacion di awa na Bubali (RWZI). Pa añanan largo a sinta cu gobierno pa mira cual ta e miho solucion, ya cu esaki ta afecta e pilar economico di Aruba. Pero tambe nomber di e isla. Pero a keda pospone.
A pone 16 miyon riba presupuesto na 2022 y despues a kita esaki den forma misterioso for di e presupuesto. Awo e sla a bini pa gobierno. Corte a dicidi cu a actua inhusto pa cu Amsterdam Manor y mester compens’e pa tur e añanan di problema sin solucion, cuminsando for di 2002 te dia cu tin un solucion definitivo.
E decision aki a yega dia 13 di december ultimo.
Decision final ta cu pais Aruba a actua inhusto door di no tuma medida, of no suficiente, contra e molester causa pa e RWZI den forma di holo stinki y muscanan cu e ta trece.
A condena pais Aruba pa compensa e hotel pa e daño cu el a sufri y lo sufri, for di 2002 y durante henter e temporada cu no drecha e RWZI. Y tambe den e periodo cu no yega na un forma adecuado pa procesa e awa sushi, cu e no ta causa molester.
