Awe Gobernador di Aruba, Alfonso Boekhoudt, a ricibi e acuerdo di gobernacion firma for di Evelyn Wever-Croes. Durante di e ultimo simannan, Wever-Croes den su rol como formador a reuni regularmente cu Gobernador Boekhoudt pa duna relato di e progreso y implementacion di e encargo di formacion.
Aparte di entrega di e acuerdo di gobernacion, tambe formador a informa Gobernador Boekhoudt tocante e reparticion di cartera. Den e gabinete nobo, lo tin ocho minister, mescos cu esun saliente. Cu e diferencia cu MEP a bay dilanti cu un minister, esta di cinco pa seis minister.
MEP lo haya seis minister:
- Minister di asunto general, innovacion, organisacion gubernamental, infrastructura, planificacion teritorial y alabes prome-minister
- Minister di finansa y cultura
- Minister di husticia y asuntonan social
- Minister di labor y integracion
- Minister di salud publico
- Minister di enseñansa y deporte
Mientras cu partido RAIZ ta haya dos minister:
- Minister di asunto economico, comunicacion y desaroyo sostenibel
- Minister di integridad, naturalesa, transporte y cuido di grandinan
Finalmente formador a haci entrega na Gobernador tambe di e documentonan den cuadro di screening di e ministernan nobo. Pronto Gobernador lo papia cu formador tocante e resultado di e analisisnan. Despues cu e proceso aki finalisa, lo huramenta e ministernan.
Por pronostica cu e prome minister lo keda Evelyn Wever-Croes. Esey kiermen cu el a dicidi di tuma e cartera di infrastructura tambe over, cu den pasado tabata bou di POR, esta ex-minister Otmar Oduber y despues Marisol Lopez-Tromp. No ta nota unda e cartera di companianan estatal a bay ni tampoco ministerio di energia.
Den e cambionan por observa cu finansa a keda cu cultura, pero a kita economia. Husticia a haya asuntonan social hunto cu ne, aunke ainda no tin un nomber concreto kende pa tuma e encargo aki, mara na ken a pasa screening pa bira minister di husticia. Di otro banda, a nota cu labor a bay cu integracion, manera cu minister demisionario Glenbert Croes a pidi, esta pa e haya DIMAS bou di dje. A opta pa laga Minister di Salud Publico para su so e biaha aki. Y a observa cu a inclui deporte hunto cu enseñansa. No ta conoci ainda unda lo postula Dangui Oduber awo den e siguiente formacion di gabinete, ni tampoco kende ta e dos ministernan nobo cu lo uni na e gabinete actual, forma pa Evelyn Wever, Xiomara Maduro, Dangui Oduber y Glenbert Croes.
Den caso di partido RAIZ e ta bastante facil, pasobra Geoffrey Wever a bisa publicamente cu e tin afinidad pa e ministerio di asuntonan economico. Como cu nos no ta mira turismo ningun caminda, ta asumi cu lo inclui e e biaha aki bou di ministerio di asuntonan economico? Den caso di Ursell Arends, desde salida a opta pa e ministerio di integridad, aunke eybou no tin mucho actividad ainda. De facto, e ministerio cu el a haya no tin e peso necesario tampoco como partner di e gabinete actual. Ta notabel cu RAIZ a tuma dos ministerio di menos peso, compara cu locual POR a exigi den e gobernacion anterior, esta husticia y infrastructura.
Eleccion na juni 2021
Eleccion parlamentario a tuma luga riba diabierna 25 di juni 2021. Pa prome biaha den historia tabata 12 partido cu a participa. Un total di 70.283 ciudadano tabatin derecho di voto, di cual 58.610 a vota. Ambos partido grandi, AVP y MEP, a bay atras den voto. Mester menciona cu AVP a bay hopi mas atras y asina MEP a bira e partido mas grandi di Aruba. Aunke MEP a bay atras como partido, e lider a bay hopi padilanti y a bira vote-getter den eleccion 2021. Partidonan chikito a crece pisa, manera MAS, RAIZ y Accion 21. A pone cu nos parlamento ta consisti awo di cinco fraccion, MEP cu 9 asiento, AVP cu 7 asiento, MAS cu 2 asiento, RAIZ cu 2 asiento y Accion 21 cu 1 asiento.
Tocante partido RAIZ
Tai Foe Lee & Ursell Arends a funda Partido RAIZ dia 9 di Juni 2017. Lider desde fundacion ta Ursell Arends y a participa dos biaha den eleccion, na september 2017 y juni 2021. Record maximo di voto: 5481 (2021) y record minimo di voto: 2107 na aña 2017. Ideologia di Partido RAIZ ta social democrata, progresivo y liberal.
Tocante partido MEP
Gilberto F. “Betico” Croes a funda Movimiento Electoral di Pueblo (M.E.P) dia 9 di Februari 1971. Lidernan desde su fundacion tabata Gilberto F. “Betico” Croes, Nelson Oduber y Evelyn Wever-Croes. A participa 17 biaha den eleccion. Record maximo di voto: 25,172 (2001) y record minimo di voto: 8095 (1973). Den e ultimo eleccion na juni 2021, partido MEP a logra 20.700, bon pa 9 asiento den Parlamento. Nan ideologia ta social democrata.
