Ya pa varios aña caba e bendemento di producto riba Vraag & Aanbod tabata algo cu e comerciantenan local tabata protesta contra, ya cu mientras cu nan (e comerciante) ta paga belasting, e bendedo riba Vraag & Aanbod no ta haci esaki.
Minister di Economia, Geoffrey Wever a indica cu esey ta un grupo cu Gobierno mester adresa. Segun e mandatario, no tin nada contra di e grupo aki, pero na momento cu tin un negoshi mester registra esaki y paga tur belasting. Esey ta un exigencia di pais Aruba y lo keda conta. No por cambia regla pa acomoda otro cu no ta contribui cu su ‘fair share’.
Den e combatimento di economia informal, Gobierno lo duna nan e oportunidad pa registra. E reglanan no a cambia. Nan ta un competencia inhusto pa otro empresanan. Mientras cu e empresario registra ta cumpli cu su parti, esunnan cu ta bende riba Vraag & Aanbod no ta contribui na caha di Gobierno.
