Awe varios mandatario for di Caribe Hulandes ta yega Aruba den preparacion pa e prome reunion tripartiet bou di Gabinete Wever-Croes II cu a huramenta na september ultimo. E reunion tripartiet ta tuma luga mañan dialuna, den cual e prome mantarionan y algun otro colega minister di Corsou y Sint Maarten ta presente pa hunto fiha un solo posicion riba e sosten di likidez cu ta ricibi di Hulanda, acuerdo di COHO y varios otro punto di interes comun. Awe merdia Prome Minister Silveria Jacobs y Minister di Finansa Ardwell Irion di Sint Maarten a yega Aruba p’e reunion.
Durante di e encuentro cu Minister Presidente di Aruba y di Corsou y e respectivo Ministernan di Finansa y nan conseheronan, lo elabora riba temanan cu ta di interes pa tur e tres islanan. Topiconan ta entre otro e retonan di likides, areglo di FASE, COHO y otro temanan di relevancia y di actualidad. Esaki ta bira e prome bishita oficial di gobierno di Sint Maarten na Aruba desde formacion di e di dos gabinete Wever-Croes.
Hecho ta cu e Landspakket cu tanto ta den discusion politico na Aruba, ta conta igualmente tambe pa e islanan Corsou y Sint Maarten. Por lo menos na Corsou ta otro gabinete e firma pa e acuerdo y esun cu a gana eleccion ultimo mester ehecut’e, mientras cu Sint Maarten na un principio tampoco kier a bay di acuerdo cu e pakete, pero na final a haya nan mes forsa pa ehecuta e pakete, di lo contrario nan lo a keda sin sosten financiero di madre patria. Pa mas informacion y detaye, lesa e edicion di TREMPAN di dialuna.
