Diahuebs 14 di juli, Minister-president Evelyn Wever-Croes, Minister di Husticia Rocco Tjon y Minister di Enseñansa Endy Croes a reuni cu e miembronan di sindicato SIMAR, SEPPA, SADA, SPA y TOPA.
Minister-president a splica cu Gobierno ta na mesa cu Hulanda ainda riba e pago di 5%. Hulanda a indica cu no ta di acuerdo pa Aruba paga e 5% pasobra Aruba lo no ta cumpliendo cu tur condicion. Mas specifico, e ley di Wever-Croes-Norm, pues e LNT. Esey tabata un condicion adicional di Hulanda pa por paga e 5%. Gobierno a entrega e concepto di ley segun instruccion di Conseho di Minister di Reino.
Parlamento a trece algun cambio den e ley y awor Hulanda ta bisa cu pa e motibo ey, Aruba no a cumpli y cu no por paga e 5%. Gobierno di Aruba no ta di acuerdo cu esaki, y ta den dialogo cu Hulanda pa resolve e punto aki.
Minister-president a informa e sindicatonan cu Gobierno a prepara pa e pago pero kier sali afo cu Hulanda prome. P’esey awor ainda no por duna garantia. Di e parti di sindicatonan a trece padilanti cu e 5% aki ta necesario pa e miembronan. Minister-president ta comparti e opinion ey.
Aruba ta pasando den momentonan dificil debi na e efectonan di e pandemia y e crisis social economico causa pa e guera na Ucrania. Costo di bida a aumenta y Gobierno ta sinti cu no por keda sin paga e 5% mas. Minister-president a sigura e sindicatonan cu nan lucha pa e 5% ta prioridad di Gobierno. Y a pidi e sindicatonan keda pendiente pa e reunionnan entre Aruba y Hulanda den e siguiente dianan.
