E grupo di Palmaruba Group a reuni na notario Chamila Tromp di New Leave pa firma e documentonan oficial pa pasa e tereno erfpacht p’e desaroyado di e proyecto Caribbean Town. E desaroyadonan di e proyecto a firma e acta notarial hunto cu director di Directie Infrastructuur en Planning (DIP), den presencia di nan abogado. Awor por cuminsa construi y bende e propiedadnan cu e lista largo di esunnan interesa den e concepto moderno aki pa Aruba.
E proyecto Caribbean Town Villas & Apartments
Caribbean Town Villas & Apartments ta situa den e bario di Eagle. Ta un proyecto residencial di no menos cu 330 unidad riba un tereno di aproximadamente 42.000 m2. Ey lo construi 4 edificio grandi di 7 piso cada un, mas 32 cas para riba nan mes. Ta un inversion di mas of menos 65 miyon florin, basa riba financiamento local y dedica specialmente pa e mercado local tambe.
E proyecto lo tin un duracion di mas of menos dos aña y mey y cu lo percura pa bastante cupo di trabou, sea directamente como indirectamente. E compania ultimo tempo a inverti den varios proyecto residencial pa e sector turistico pero ta sinti cu e compania a desaroya, madura y ta financieramente solido pa por start awor cu un proyecto residencial pa local. E diferencia den esaki ta cu ta percura pa wanta e prijsnan hopi abou, pa por ta pagabel pa nos mesun hendenan.
Un momento di celebra
E acta di firmamento pa haya e erfpacht oficial for di Gobierno tabata un momento di celebra y tambe p’e comunidad di Aruba cu no tin un vivienda ainda. Ing. Victor Acosta, desaroyado, a indica cu a formalisa e procesonan legal, e derechonan di e desaroyo dje proyecto. Palmaruba a planea pa cuminsa construi e aña aki na october y termina e proyecto na aña 2024. Lo construi e proyecto den dos fase, segun Acosta. Awor a formalisa e prome parti hunto y cu yudansa di gobierno, a logra haya e derechonan pa cuminsa construi. Tambe pa ofrece vivienda pagabel, bou condicionnan faborabel, di calidad halto p’e hendenan, e famianan cu ainda no tin un vivienda.
Inicio di un era nobo di vivienda local
Loke ta haci Caribbean Town diferente ta cu e t’un proyecto piloto diseña como transicion di un cas tradicional, den forma cu e famia Arubiano ta custumbra di biba. Esaki ta un apartamento halto di un ciudad manera Amsterdam of New York, unda hende ta biba den condominio. Caribbean Town a tuma componente di construccion tradicional y a tuma componente di condominio, unda a uni nan pa crea un producto cu ta transicion y lo haci cu esun cu cumpr’e lo biba confortabel den dje.
E concepto di e proyecto aki ta pa desaroya condominio manera ta conoci den mercado turistico, pero esaki ta condominio p’e mercado local, pues di un estilo di bida local. Diseña special p’e esunnan cu no ta interesa mas pa tin cura grandi, cu no kier chapi cura mas, tin di mantene, tin cu verf, pero ta prefera di biba den un compleho.
Bisiñanan lo forma un asociacion
Ora biba den un compleho asina, ta bin otro reglanan di wega. Por ehempel, tur bisiña doño di un condominio lo bay di acuerdo pa hunto forma un asociacion. No solamente tin 100 hende ta biba hunto, pero nan ta bira miembro di asociacion. Nan tur hunto ta percura pa maneha y percura pa cumpli cu tur regla estableci. Por ehempel, regla cu ta bisa si ta permiti bestia of no. Den caso cu esey no ta permiti, e ta un elemento cu no lo bin cu ne y asina tin hopi mas. Esey ta regulacionnan cu ta bin cu ne pa biba den un comunidad. Ora di desaroya esey, asina ey lo tin un comunidad cu ta biba cu otro. E diseño dje condominio no ta cu ta biba riba otro, pero ta traha di tal forma cu ta permiti e bisiñanan biba hunto den un comunidad.
Ora ta biba den un compleho mester pensa tambe riba gastonan cu ta comparti pa mantene piscina, gym, seguridad pa e casnan eyden, mantencion di matanan, etc.
E proceso di prebenta lo cuminsa pronto
Pronto lo lansa e proyecto pa tur hende mira y pa por cuminsa cumpra, unda lo ofrece condicion di benta cu prijsnan unico. Segun Victor Acosta, nan tin mas di 30 aña ta traha den e sector aki. Loke nan tin di ofrece, ta unico. Dentro di algun siman lo cuminsa duna presentacion particular n’e hendenan cu mester di un vivienda.
Pa mas informacion
Pa esunnan cu kier sa mas di e proyecto aki por subi e pagina di www.dip.aw pa admira un video y download e formulario pa mas informacion. A prepara hopi informacion dje proyecto grandi aki, tambe a structura diferente informacion. Dentro di dos pa tres siman lo divulga mas detaye concreto di prijs, ki tipo di vivienda, ki piso nan kier, regulacion, financiamento y hopi mas.
E proyecto ta cumpli cu metanan di desaroyo sostenibel
Abogado mr. Lincoln “Dello” Gomez tabata presente n’e momento aki, pasobra bufete Gomez-Coffie a atende cu e parti huridico den desaroyo dje proyecto Caribbean Town. Nan a atende cu e proceso desde momento cu a haci e aplicacionnan necesario na gobierno. A percura cu por a bin na remarca pa desaroya e proyecto conforme e deseo- y specificacion cu gobierno a pone. Gobierno a informa cu kier un proyecto cu ta sirbi un cierto parti di mercado y den dje a pone diferente rekisito p’e desaroyo sostenibel pa cumpli cu e SDG’s.
Tocante Palmaruba
Palmaruba Group ta existi desde 1991 y ta responsabel pa varios proyecto residencial, di condominio y di hotel riba nos isla. Entre e lista largo di proyectonan, ta figura entre otro Villas Montaña Alta, complehodi apartamento na Boegoeroei, Ponton Plaza, Villas Gran Sabana na Sabana Liber, Montaña Plaza, Palma Real na Palm Beach, Hooiberg Plaza, Calbas Plaza, Oceania Residence, PalmAruba Condos y mas. Nan tin un bon nomber den comunidad pa ta cumpli y finalisa tur nan proyectonan, pa cual banconan local semper a sostene nan iniciativanan residencial.
