“Siman pasa diaranson, algun turista cu a bin cu Royal Caribbean Cruises, a demostra comportacionnan totalmente inaceptabel di nudismo y sex den publico. Esaki ta actonan castigabel, cu nos no ta tolera na Aruba, ni di localnan y tampoco di turistanan”, asina Gabinete Wever-Cries II a duna di conoce den un relato di prensa emiti awe mas trempan.
Mientrastanto a manda carta pa e crucero pa expresa e desacuerdo di Gobierno di Aruba pa cu e comportacion inaceptabel di e bishitantenan en cuestion. Tambe a avisa e establecimentonan caminda e comportacionnan aki a manifesta nan mes, cu tipo di actonan
sexual cu ta graba riba video, no ta aceptabel y cu nan por perde nan permiso di operacion.
Ta importante si pa no generalisa. Gobierno di Aruba ta lamenta e consternacion cu e turistanan aki a causa riba nos pais y ta determina pa percura pa esaki no ripiti. Na Aruba nos conoce normanan cu nos ta tene nos ciudadanonan na dje y na cual nos turistanan tambe mester atene nan mes na dje.
