Riba diahuebs merdia 7 di mei, Gobernador di Aruba, S.E. Alfonso Boekhoudt a haci un bishita di trabou na Fundacion Pa Nos Comunidad (FPNC). E bishita a tuma luga den cuadro di e brote di Coronavirus (COVID-19).
FPNC ta duna comestibel gratis na persona of famianan cu financieramente no por of casi no por sobrevivi. Ademas, cu e actividad aki FPNC ta percura pa evita drispidimento di cuminda. Gobernador a cuminsa su bishita cu un recorido na e localidad di Club Kibrahacha. For di e luga aki FPNC ta prepara y distribui cuminda y caha di alimento. Despues Gobernador a combersa cu e boluntarionan, trahadonan y miembronan di directiva di FPNC, unda nan a informa Gobernador con nan ta enfrenta e retonan cu e situacion di crisis ta trece cune.
Pa medio di e combersacionnan telefonico y, si ta posibel, bishitanan di trabou, Gobernador Boekhoudt ta informa su mes tocante e consecuencianan di e brote di coronavirus y ta expresa su apoyo y aprecio pa e esfuerso di hopi persona den e lucha contra e pandemia. Ta tuma medida, den consulta cu e organisacionnan involvi, pa asina e bishitanan di trabou por tuma luga na un manera sigur.
