Te dia 9 di september Gustave Nouel ta expone como artista invita cu un exposicion individual di Jazz-Art den Slot Kleverkamp na Deventer. Tambe e ta participando hunto cu otro artistanan famoso Hulandes na un exposicion nacional na Ruurlo te dia 22 di juni.
(www.mathildeinruurlo.nl). E obranan di e artista Arubiano a impresiona Jos van Gils, editor di e revista nacional 50Vitaalplus tanto cu ela ofrece e Arubiano promocion nacional cu un articulo grandi den su edicion di mei/juni. Tin 50Vitaalplus den casi tur ‘wachtkamer’ na Hulanda.
Ultimo añanan Gustave Nouel – hunto cu amigonan profesional – a entama un proyecto interdisciplinario aspirando calidad internacional den forma di un buki artistico den cuater idioma titula ‘Maternidad’. E buki tin como base e cuadronan cu Nouel a pinta durante henter e proceso di embarazo di modelo y actriz Arubiano Zuleika Coffie te despues di nacemento di su yiu muhe Lilian, compartiendo su pensamento y reflexion maternal. 
Intencion ta pa presenta e buki na 2019 den Biblioteca Nacional di Aruba. Relaciona cu celebracion di 60 aña Biblioteca na Aruba, Nouel a ser invita na 2009 pa duna un exposicion, workshops y otro actividadnan. Esaki tabata un proyecto exitoso hunto cu Universidad di Aruba caminda GN a duna masterclass. E biaha aki tin interes explicito na Aruba pa un presentacion di e pinturanan cu a ser publica den e buki (sea digital of traditional).
E buki ‘Maternidad’ lo wordo publica/presenta pa LM publishers y Gustave ta spera di por presenta e buki efectivamente na Aruba hunto cu Zuleika Coffie y e otronan cu a coopera.
Contando riba suficiente apoyo na Aruba y un team professional encabeza pa Ramon Todd Dandaré e presentacion di e buki ‘Maternidad’ na Aruba mester bira un exito.
Danki na e cooperacion capabel di Ramon Todd Dandaré, Steffen Maas, Quito Nicolaas, Rosabelle Illes, Maureen Berkel, Benne Solinger, Fred de Haas, Helen Francis y otronan, e buki ‘Maternidad’ indudablemente lo logra un nivel internacional.
E buki aki den e cuater idioma mas papia na Aruba (Papiamento, Hulandes, Ingles y Spanjo), tambe por ta instrumental pa promociona Papiamento internacionalmente.
