Luciendo e uniform nacional y cu e confiansa di por experencia un competencia diferente, e jovencita gimnasta di e selecion di Aruba, Amika Every (12 aña) a sali pa Panama, hunto cu e delegacion di Aruba pa e “VIII Campeonato Centroamericano de Gimnasia Juvenil” pa participa cu alrededor di cien alteta di shete diferente pais di Centro America, Caribe y Mexico. Ya caba e entrenamentonan a inicia y e competencia ta tuma lugar diasabra dia 3 di November.
Amika Every ta integrante di e selecion nacional hubenil di e Federacion Gimnastico Arubano (FGA), cu a wordo seleciona pa e comision tecnico di FGA pa representa Aruba den e disiplina di gimnasia artistica femenino hubenil. Ta e prome ocacion cu un gimnasta hubenil di Aruba ta atende dicho competencia.
Tras di lunas di preparacion pa por a atende e competencia Panamericano na luna di Juni y despues di a recupera di un lesion na su pia, Amika a continua cu su preparacion na Medellin y Republica Dominicana y ta cla pa e siguiente reto. Parti di su preparacion tabata e campeonato Suramericano na Cali den luna di Juli unda cu Amika a logra retene su titulo di campeon Suramericano pa e aparato di piso. Amika a demostra un interes permanente pa perfeciona su estilo y pa siña elemento nobo pa logra alcansa e requisitonan di e categoria hubenil.
Participacion na e campeonato Centroamericano ta un reto nobo pa Amika ya cu ta e prome biaha cu Aruba ta competi den categoria hubenil riba nivel internacional. A realisa algun modificacion den su entrenamento como tambe den su rutinanan como cu e structura di presentacion y puntuacion ta usa parametro y reglanan di e Federacion Internacional di Gimnasia (FIG). E gimnasta Arubano tin un bon nivel di competencia y ta concentra pa obtene un bon presentacion di su rutina y purba logra ehecuta algun elemento nobo.
Amika ta forma parti di e delegacion cu ta representa Aruba na “VIII Campeonato Centroamericano de Gimnasia Juvenil” na Panamá hunto cu gimnasta Kim de Vries, coach nacional sr. Jimmy Palma acompaña pa presidente di FGA, sra. Milly Bagheri. Amika lo midi su nivel competitivo den e aparatonan Salto, Barra Asymetrica, Viga y Piso den e categoria hubenil (13-15 aña) banda di su contrincantenan di El Salvador, Guatemala, Nicaragua, Honduras, Panama y Mexico.
