Gilbert Doran (MFK): Lo kuminsá ku eksámen na e diferente nivelnan eskolar, kon lo bai atendé ku COVID-19

Denter di algun luna lo kuminsá ku eksámen na e diferente nivelnan eskolar, kon lo bai atendé esaki en relashon ku COVID-19 i konta midi efektividat di dunamentu di lès riba distansia

Pa medio di e karta aki suskrito kier ekspresá un preokupashon grandi ku ta biba serka alumnonan di diferente nivel eskolar ku lo mester bai pasa eksámen otro aña. Motibu di e preokupashon aki ta pa motibu ku alumnonan no por a sigui lèsnan manera ta kustumber e aña eskolar aki, pa motibu ku durante di e aña eskolar aki hopi dosente tabata ousente i meskos alumnonan, tur esaki pa motibu di COVID. No mester lubidá ku pa un temporada skolnan tabata sera tambe.

Mirando ku tin sin sierto eksámen ta wòrdu traha na Hulanda, e alumnonan tin miedu ku debí ku e aña eskolar aki nan no a haña edukashon na e nivel kustumbrá pa motibu di COVID, ku nan ta den desbentaha pa por pasa e eksámen ku éksito.

Den e situashon ku nos ta biba di COVID, skolnan a kuminsá duna lèsnan pa medio virtual pa asina por limitá e kantidat di muchanan na skol, frakshon di MFK ta mira esaki komo un oportunidat ku den futuro nos mester bai mas den e direkshon ei.

Pero serka MFK ta biba e preokupashon kon ta midi e efektividat di dunamentu di lès virtual versus e manera tradishonal. Ku otro palabra kua ta e instrumentonan ku departamento di enseñansa tin na su disposishon pa midi ku di bèrdat esnan ku ta sigui e lèsnan di forma virtual ta komprondé e lès i ta partisipá efektivamente na e lèsnan.

Dosentenan i alumnonan ta preokupá ku ya no ta informá na skolnan ora un dosente òf un alumno tin COVID.

Konforme artíkulo 96 di reglamentu di órden suskrito ta aserka Minister Eugene Rhuggenaath ku e siguiente preguntanan relashoná ku e tópiko ariba menshoná.

1. Minister por informá suskrito ku si ta bèrdat ku skolnan no ta informá dosentenan i alumnonan ora tin un kaso di COVID na un skol spesífiko, manera esaki tabata sosodé te ku resien?

2. Si kontesta na pregunta #1 ta afirmativo kiko ta e motibu pa e kambio aki i kon ta atendé i informá esaki awor?

3. Manera ya menshoná alumnonan ta ekspresando ku nan a pèrdè hopi lès e aña eskolar aki i ku nan no ta sinti ku nan tin e nivel apropiá pa por pasa un eksámen, mas ainda un eksámen ku ta ser prepará na Hulanda i ku lo no tene kuenta ku situashon di e alumnonan aki na Kòrsou, kon departamento di enseñansa lo bai atendé ku e problemátiko aki?

4. Kua ta e plannan konkreto di gobiernu di Kòrsou pa ku eksámennan di otro aña?

5. Kon lo bai informá mayornan i alumnonan riba e forma ku lo bai pasa eksámen, si bin kambio den esaki?

6. Minister por informá, kon departamento di enseñansa ta midi efektividat di dunamentu di lès riba distansia?

7. Kua método i/òf téknika ta wòrdu usa pa hasi e kontrol tantu didáktiko, komo partisipativo di lèsnan virtual?

8. Tin un rapòrt kaba kaminda a hasi evaluashon di dunamentu di lès di forma virtual?

9. Si kontesta na pregunta 8 ta negativo, pa ki dia por nos por spera un rapòrt di evaluashon?

Frakshon di MFK den persona di Gilbert Doran ta spera pronto di haña un kontesta, pa asina pueblo i e mayornan por ta informá riba e temanan ariba menshoná.