Tabata riba 24 di april 2016 den oranan di marduga cu tiro a cay den un chollerhouse den Rancho. Na e e chollerhouse tabata biba sr. A.R. Granados Noguera, miho conoci como“Viejo”, kende tabata un bendedo di droga den Rancho.
Dos testigo a reconoce Gerrito Eckmeyer como un di e dos personanan cu a sali na careda na e sitio. Conclusion ta cu a condena Eckmeyer na 15 aña di prizon tres aña pasa. Pero awe e ta liber despues cu su abogado mr. Demis Illes a mustra tur e buraconan cu tin den e investigacion, pero tambe hopi declaracion cu ta dudoso, cu no tin nada concreto pa condena e persona aki.
Dia di e sucedido tabatin dos persona den cercania cu a core bay mira kico a pasa den e chollerhouse y nan ta esnan cu a bin haya “Viejo” tira na suela cu un tiro den cabes y sin bida.
E detencion so a tarda pa cay, ya cu ta te despues di algun luna e dos testigonan a bin declara cu esnan responsabel pa morto di “Viejo” ta un Venezolano flaco cu un tattoo na su nek y un homber Arubiano cu nan a reconoce como yiu di un homber di fam Eckmeyer. Durante tratamento di e caso den prome instancia caba a cuestiona e tardansa pa e testigonan duna un declaracion.
Ora cu e investigacion a cuminsa, a base di locual algun testigo a declara, por a saca afo cu dos persona ta responsabel pa e acto aki. Despues di algun luna un di e testigonan a bin declara cu na su parecer e hendenan cu ta responsabel lo ta un Venezolano flaco cu un tattoo na su nek, y e di dos un Arubiano cu e ta reconoce como yiu di Eckmeyer. Otro testigo a declara cu a wak dos persona tambe, pero un hende masculino gordo y e otro flaco.
Na aña 2016 ora cu e caso aki tabata andando tabatin un otro caso cu tin di haber cu diferente atraco cu tabata wordo cometi door di algun Venezolano. E tempo ey polis a logra pone man riba e banda Venezolano aki y a logra detene diferente persona. Entre e personanan aki a detene e sospechoso Noel Velasques y Gocho. Na mes momento, recherche pa casualidad tambe a hay’e e nomber di e yiu di Eckmeyer, cu lo ta Gerrito Eckmeyer.
A detene Gerrito Eckmeyer pasobra testigo lo a mir’e como un di e personanan responsabel pa a mata Viejo. Pa puro casualidad Gerrito Eckmeyer y Noel Velasques a wordo deteni na mes momento, y cera na e mesun warda di polis. Ta na e momento ey cu Noel Velasques ta conta polis cu Gerrito Eckmeyer lo a conte den prizon cu su persona y un otro Venezolano conoci como Gocho, lo a bay horta droga di Viejo y a tir’e mata. Gerrito Eckmeyer sinembargo semper a nenga cu e tin algo di haber cu e caso di Viejo.
Remarcabel ta cu Noel Velasquez tin un parecido y tin tur “kenmerken” di e di dos persona cu lo ta involucra den mata Viejo. Polis a bolbe busca e testigo cu a wak tur cos y e testigo a reconoce Noel Velasquez como e di dos persona involucra. A base di esaki fiscal a hiba e caso dilanti contra Eckmeyer y Velasquez.
Corte di prome instancia, basa riba loke e testigo a declara, a condena Gerrito Eckmeyer na 15 aña di prizon pa a mata Viejo, pero si a laga Velasquez bay liber, paso no a haya cu tin suficiente prueba contra su persona.
Fiscal a apela e sentencia di Velasquez. Y Gerrito Eckmeyer a apela esun di dje.
Prome cu e caso a wordo trata den apelacion, durante un pro-forma na corte superior Procurador General e hala e apelacion di Velasquez aden, pasobra na su opinion lo no tin suficiente prueba pa condena Velasquez. E caso di Eckmeyer si a sigui. Mirando e situacion cu a surgi, y cu awo Eckmeyer ta e unico sospechoso den e caso, familiarnan di Eckmeyer a busca abogado nobo pa Eckmeyer. Asina e defensa a bay di nobo den apelacion, awor den man di abogado mr. Illes.
Illes den un defensa bastante peculiar a sa di convence Corte Superior cu aki no por conclui cu por papia di suficiente prueba legal y convicente pa por hustifica e condena di su cliente. Den un caso via video-conference te den oranan laat di atardi, Abogado Illes a repasa e declaracion di e diferente testigonan y a splica di con cadaddeclaracion no por cuadra y no ta yuda na saca un conclusion solido cu Gerrito Eckmeyer ta culpabel.
Pa defensa tabata hopi straño cu procurador generaler a uza e testigo cu lo a wak y reconoce tur dos sospechoso, solamente den e caso di Eckmeyer. Ora ta yega na e caso di Velasquez, no obstante cu e testigo ta bisa di a reconoce Velasquez tambe, procurador general no a haya esaki suficiente pa hustifica un condena di Velasquez mes. E abogado a cuestiona e punto aki severamente. Pasobra con por ta posibel cu ta uza e declaracion den e caso contra su cliente so, y ora ta yega n’e otro acusado e declaracion no ta suficiente?
Un otro parti di e defensa tabata cu e di dos declaracion cu Ministerio Publico kier a uza pa condena Gerrito Eckmeyer ta bin di Velasquez su mes boca tambe. Velasquez cu mes ta un sospecho den e caso, y di cual a wordo bisa cu e mes tabata presente na e tiroteo. Abogado Illes a splica Corte Superior cu si Velasquez mes tabata presenta na e tiroteo, ta mas cu obvio cu e lo por conta exactamente kico a pasa, pero cu esey no kiermen cu e ta papiando berdad sin mas.
Tumando na cuenta cu Velasquez tin tattoo na nek, y ta cuadra full cu e descripcion cu testigonan a duna di un homber flaco, por bien ta cu ta Velasquez mes tabata un di e sospechosonan, segun e abogado. E pregunta, segun e abogado ta bira e ora, pa ken Velasquez ta tapa. Ta cu ken elo a comete e hecho? Pero Velasquez mes ta nenga di tabaatey presente na Rancho tambe. Segun e abogado, esaki ta pone cu e declaracion di Velasquez no por wordo uza como prueba. Ademas e abogado a splica Corte cu tin 3 scenario segun e dossier. Un scenario cu su cliente ta envolvi, e otro cu ta Velasquez y Gocho, y e di tres scenario cu ta Eckmeyer y Gocho. Den bista di esaki no por conclcui sin ningun duda cu su cliente lo ta culpabel, segun Illes.
Corte Superior despues di e analisa e caso y dunando sentencia mas trempan cu riba e dia anuncia, a sigui e ponencianan di e abogado, y a conclui cu enberdad , no obstante cu un testigo ta bisa di reconoce Eckmeyer, toch ta keda duda cu si Eckmeyer ta involucra di berdad.
Pa cu esaki Corte superior a tene na cuenta cu Ministerio Publico mes tambe a opta of ta haya cu e declaracion di e testigo cu lo wak y reconoce Velasquez y Eckmeyer, no por wordo uza sin mas. Corte Superior a declara Eckmeyer liber di e caso di asesinato. Eckmeyer a wordo condena sinembargo na 21 luna di prizon pa posicion di arma di candela den un otro caso.
