Gerlien Croes (AVP): Oposicion no ta haya chens pa presidencia di comision
Tema pa presidencia y vice-presidencia di e diferente comisionnan den parlamento ta manera un sumpiña den sapato di varios di e parlamentarionan.
Hecho cu oposicion no a haya presidencia ni vice-presidencia ta un factor cu a trece dilanti no di awo, pero for di algun tempo caba.
Mr. Gerlien Croes, parlamentario di partido AVP, a menciona cu ya tabatin dos reunion den comision central riba e topico aki. for di e prome reunion a trece dilanti e hecho aki.
Croes a menciona cu tabatin un preocupacion pasobra momento cu a haya e documentonan, a mira cu oposicion no ta haya espacio pa por tin un chens pa ta presidente of vice-presidente di e comisionnan aki.
Ta papia di cambia parlamento, ta papia di duna oportunidad na e generacion nobo. Por mira cu di e generacion nobo, tin persona otro banda sinta cu ta profesional den varios area.
A pidi coalicion pa por fabor pa ta mas adulto riba e hecho aki y tene na cuenta cu tin miembro di parlamento cu ta specialisa riba un area y cu lo por duna un miho aporte den e comisionnan aki pasobra ya el a traha den e area of e conoce kico ta e ‘keten’ completo den e sector.
A nenga oposicion rotundamente. Lider di fraccion di e partido mas grandi den coalicion a bisa cu absolutamente cu no, a dicidi caba. Esey no ta nifica cu ta otorga esunnan nobo e chens pa ta presidencia, pasobra e ta aumenta nan experiencia. pero na mes momento ta haya cu mester ta tiki mas adulto ora cu ta tuma e decisionnan aki, y stop di wak pasado y tira cu semper cos tabata asina.
Aworaki ta papia di mira padilanti. Croes ta kere cu parlamento mester haya su luga y esaki ta inicio di e proceso unda cu ta duna miho contenido tambe na parlamento.
Croes a spera na cierto momento cu kisas nan ta haya un sosten, vooral di e profesionalnan hoben cu ta den e partido u ta sostene gobierno, pero esey no tabata e caso.
Pa cobertura mas amplio lesa edicion di TREMPAN mañan.
