Diahuebs anochi ELMAR a trece su banda di medaya riba henter e asunto di prijs di coriente. Aki a informa cu tur cos ta den man di WEB y no di nan.
Minister di Economia, mr. Geoffrey Wever, a bisa cu su persona no ta bay duna un expresion riba e video di ELMAR, pero nan ta trahando pa cumpli cu e promesa pa baha prijs di awa y coriente, esey ta canando. Diahuebs nan a haya e prome propuesta, pero a mand’e bek pa haci mas analisis. Awe ta en espera di un feedback, e proceso ta canando.
Diahuebs nan a haya e prome propuesta como alternativa, pero e mandatario no ta convenci cu nan tabatin tur informacion pa tuma un decision definitivo.
Pa loke ta e reaccion di ELMAR, na un otro momento lo bay atende cu nan. Ya caba el a papia cu Glenbert Croes riba e declaracion di ELMAR, di cual nan lo adres’e na su debido tempo. E enfoke primordial ta pa finalisa y logra baha prijs di awa y coriente, ahusta e tarifanan. Esey ta e esfuerso cu gobierno ta haciendo n’e momentonan aki.
Algun dia pasa e mandatario a duna ELMAR awe te cu 12:00 pm pa entrega un proposicion, di cual nan a haci esey ayera. E trabounan ta canando, gobierno tin su expertonan ta na mesa pa analisa e cifranan, analisando loke a presenta. Nan ta trahando cu esey.
Entre e Ministerionan di Energia y Economia no tin falta di comunicacion. E ministernan di e dos ministerionan aki ta continuamente den combersacion. Nan a manda varios carta. Segun Wever, desde trempan ya caba su persona cu minister Croes ta papiando riba e desaroyo, e proposicion cu nan a haya diahuebs. E comunicacion di nivel di gobierno ta riba un solo linea. Awo ta enfoca p’e companianan di utilidad cumpli cu gobierno.
Pa mas lesa TREMPAN.COM.
