Diasabra a habri amargo pa doño di un cas na Jan Flemming 3-Z. Tabata den careda di 6’or y mey di mainta, ora Javier Dubero a schucha desordo pafo di cas, y a sali pafo pa wak kico ta pasando.
A nota un cantidad di mas o menos 7 cacho rond di su auto. E cachonan mes a core bay manera e doño a sali. Ora a bay wak, a bin constata cu su auto a keda cu basta daño, rasca na banda, rasca dilanti, rasca riba e hood di e auto y hasta un headlights dilanti saca for di su luga.
Sr. Dubero a laga sa cu lamentablemente no ta prome biaha, pasobra den pasado nan a yega di drenta bou di su pick-up y a come / ranca tur su wayanan eybou. E dia ey a haya rastro di cacho bou di su auto. Pero e no a yama Polis, pero awor cu e hecho a bolbe sosode, el a dicidi di yama polis pa mustra nan kico e cachonan a haci na su auto.
A splica polis cu ta cachonan cu sa cana varios biaha den bario y cu mayoria di nan tin banchi, pues nan tin doño. A keda hopi desapunta cu tin hende ta tuma cacho, pero despues no ta wak drechi pa nan cacho, y asina e cachonan ta cana los, causa destruccion na propiedad di hende.
Den su caso a causa daño na su auto, un Hyundai Accent, cu e tabata tin na benta y por cierto awe e tabata di bay pa e doño nobo. Debi na tur e daño cometi, e benta no por bay door awo, ya cu e tin di drecha e auto prome.
Esaki no ta un problema na Jan Flemming so, pero ta full rond Aruba ta haya cachonan ta cana los riba caya y ta causa molester den e barionan rond Aruba.
A bin cu un “Ley di cacho”, pero no tin suficiente personal pa atende cu e problema. Polis kier actua, pero hopi biaha ta mara na varios otro prioridadnan y mas tanto ta yega ora a comete e daño caba.
A sugeri pa bin cu un team special di BOA (Buitengewoon Opsporings Ambtenaar), na Aruba miho conoci como “Buitengewoon Agent van Politie” cu lo tin e solo tarea di trata activamente cu tur caso cu tin di haber cu violacion di e “Ley di Cacho” (Hondenverordering), cu a drenta na vigor na aña 2015.
Mientrastanto, mescos cu Javier Dubero, hendenan humilde rond Aruba, lo sigui haya molester di cachonan cu ta cana los riba caya.
