Gobernador di Aruba awe mainta a ricibi e concepto di un decreto nacional for di minister presidente Evelyn Wever-Croes, pa su aprobacion. E concepto di e decreto ta trata retiro di minister di desaroyo teritorial, infrastructura y medio ambiente, drs. Marisol Lopez-Tromp. Conseho di minister a aproba e retiro dia 21 di october 2020.
Gobernador di Aruba a dirigi un carta awe merdia na Presidente di Parlamento, mr. Ady Thijsen, den cual ta pidi pa e opinion di Parlamento tocante e intencion pa retira e minister. Ta pidi e opinion aki a base di articulo II.2, prome paragraf, di constitucion di Aruba.
Den e carta Gobernador ta señala cu funcionamento di gobernacion ta na peliger si no por garantisa unidad di e maneho gubernamental. Tanto pa e ministernan conhunto como pa cada minister individual ta di importancia pa, en cuanto e maneho, nan ta riba e mes un liña y cu nan ta propaga of por propaga e liña ey.
Gobernador no a menciona den su relato si Gobierno a uza e mocion di desconfiansa pasa den parlamento como base di e retiro. Awor aki, lo mester yama un reunion di parlamento pa haya “gevoelens” di parlamento relaciona cu e retiro. Atrobe e decision final ta den man di Ricardo Croes di RED pasobra si no haya su sosten, lo no tin mayoria pa por ehecuta of sostene e intencion di Gobierno pa kita un minister den funcion for di trabou. Lo ta prome biaha den historia cu ta baha un minister den funcion, a base di un mocion di desconfiansa, si acaso gobernador acepta e mocion como base di e retiro.
