Fundacion Telefon pa Hubentud ta bay organisa diferente actividad. E actividadnan aki ta den cuadro di dia 20 di november cu ta dia nacional y internacional di derecho di mucha.
James Sneek, director di Fundacion Telefon pa Hubentud, a splica cu na momento mucha ta siña tocante derecho, e ta siña uno cu e tin derecho, e ta siña cu otro persona tin derecho. E tin di sa pa respeta esaki, pero tambe e ta siña cu na momento un hende tin mal intencion cu ne, con pa para pa su mes. Dia 20 di november binidero, Fundacion Telefon pa Hubentud ta cumpli 23 aña di existencia.
E ta corda cu 23 aña pasa tabata prome bes cu mucha na Aruba a tuma e telefon, a marca e number 131. El a haya e servicio, ayudo, sosten fo’i Fundacion Telefon pa Hubentud. Awo no ta solamente na Aruba, pero nan ta duna servicio na mucha y hoben dje isla di St. Eustatius. Tambe esunnan di Saba. E aña aki ta grandi pa nan. Nan ta celebra e dia nacional y internacional di derecho di mucha.
Shurman Milliard, trahado social, a indica cu nan ta bay celebra hunto cu nan e derechonan di mucha. El a splica cu nan tin un dag afdeling y pa tur mucha ta bay haci actividad. Tambe pa e grupo di maestro.
E fundacion ta cuminsa na duna informacion n’e muchanan riba derecho di mucha. Pasobra si kier haci e celebracion di derecho di mucha, mester sa tambe cua derecho nan tin. Nan tin 54 pa 55 di derecho di mucha y ta informa nan kico nan ta. Incluso nan ta papia cu e muchanan di scol basico, y nan mester duna diferente oportunidad di nivel n’e hobennan pa sa kico e derechonan ta. Cu e muchanan mas chikito e fundacion ta haya yudansa di fundacion Hunga Teca.
Kimberly de Cuba, trahado social, a informa cu banda di e ayudo telefonico, chat y e-mail cu Telefon pa Hubentud ta duna e mucha- y hobennan, durante aña e fundacion ta presenta diferente proyecto p’e mucha- y hobennan di Aruba. Un di e proyectonan crea y produci ta chit chat. Den cuadro cu cooperacion, e fundacion a acerca Centro di Desaroyo di Hende Muhe (CEDEHM) pa ta parti dje proyecto aki. E proyecto ta encera diferente episodio, unda por mira combersacion entre hoben femenino, entre diescuater pa diesshete aña. Nan ta conta dje retonan cu nan ta topa cu ne.
Devin de Veer, representante di Marketing di Gloria, a bisa ta conoci cu MetaCorp y su subsidarionan ta duna bek na comunidad. E aña aki un biaha mas cu Fundacion Telefon pa Hubentud a bati na nan porta y asina a tuma e oportunidad pa uni na nan. Cuminsando p’e siman di dia 14 di november, a pesar di ta contribui nan salanan pa e scolnan, ta bay uni tambe cu e edificio ta bay luci n’e colornan dje fundacion. Despues dje fin di siman ey di derecho di mucha, The Movies lo ta pasando diferente clip cu Telefon pa Hubentud a traha.
