Organisacion Net Locual Bo Mester di Dje ta orguyoso cu nan por duna algo bek na comunidad di Aruba. E organisacion a bin pa yuda otro fundacionnan di Aruba, sabiendo di e crisis di COVID-19.
Mauricio David Villa, presidente di Organisacion Net Locual Bo Mester di Dje, a bisa cu nan a dicidi pa yuda fundacion Mary Joan door cu den cada famia por tin un persona cu ta sufri di cancer. E fundacion ta existi pa hopi aña y nan kier yuda Mary Joan Foundation pa sigui cu su bunita trabou.
Jose Tromp, miembro di directiva di Mary Joan Foundation, a bisa di ta gradici na e gesto aki y nan lo haci bon uzo di dje. Pa motibo di e crisis actual, fondonan di e fundacion a baha. E biaha aki nan no lo organisa e recaudacion di fondo anual.
Fundacion Net Locual Bo Mester di Dje Ta bay organisa un rifa na balor di dies florin, pero e premio no lo ta exactamente cash. Lo tin cuater premio cu por gana, cual ta cubri pago di huur pa luna durante periodo di un aña, cuminda pa luna na balor di 300 florin, awa na balor di 250 florin y electricidad na balor di 250 pa 300 florin pa luna. Pa cumpra e ticket y door di e situacion di COVID-19, lo tene un evento di drive thru pa mantene e distancia social.
