Durante un conferencia di Prensa e lider di AVP, mr. Mike Eman y Presidente di Fundacion Digna Lacle Herrera (FDLH), dr. mr. Rycond Santos do Nascimento a anuncia un ciclo nobo di curso pa formacion politico cu e dos organisacionan aki ta ofrece na comunidad. Fundacion Instituto Formacion Politico Digna Laclé-Herrera ta anuncia cu diahuebs 24 di maart 2022 e curso basico di Formacion Politico ta cuminsa atrobe na Cas di Partido AVP.
E curso basico ta provee un trayecto di capacitacion na tur cu ta kier contribui na nos comunidad.
Participacion na e curso ta exigi solamente un actitud activo y un contribucion di 50,-. No tin rekisito adicional pa participacion na e curso aki. E curso ta tene cuenta cu diferencia den background, diferencia den nivel di educacion y ta habri pa tur cu tin interes irespecto nan afiliacion politico. E lesnan lo tuma luga durante seis siman consecutivo riba diahuebs di 7:00 pa 9:00 di anochi cuminsando dia 24 di maart 2022.
Docente general pa e lesnan lo ta mr. dr. Ryçond Santos do Nascimento y lo tin como docente invita cu amplio experiencia den nan ramo: mr. Mike Eman pa locual ta trata maatschappelijke stromingen y ideologia politico, mr. Angel Bermudez pa locual ta trata e parti budgetrecht, e proceso presupuestario di nos sistema parlamentario y mr. Suzy Romer lo duna un gastcolege riba Koninkrijkszaken.
- Nos Constitucion ta e base di derecho constitucional interno di Aruba. Nos Constitucion ta crea nos sistema parlamentario a base di tres norma fundamental: responsabilidad ministerial, e principio di confiansa y e derecho pa disolve parlamento.
- Ideologia politico ta forma e filosofia general pa cu tarea y organisacion di un gobierno, organisacion di un pais y posicion di e persona den su comunidad. Cierto ideologia ta pone mas enfasis riba e libertad di e individuo (liberal), otro ta accentua e rol di estado/gobierno (socialista) y tin cu ta busca un balansa entre e dos perspectiva aki y den esey tambe ta accentua e rol di comunidad (Cristian democrata).
- E presupuesto di pais Aruba ta forma parti central di gobernacion. Nos ley conoce como norma principal cu ningun minister mag di gasta placa di Pais Aruba si esaki no ta riba e presupuesto aproba pa Parlamento. Si un gasto no ta presupuesta, ta e minister mes lo mester paga e gasto haci for di su mesun saco (articulo 31 inciso 2 Comptabiliteitsverordening). Den e proceso di crea e presupuesto gobierno ta tuma iniciativa, pero mester tene cuenta cu diferente actor, manera: CAft, Raad van Advies y naturalmente Parlamento.
- Koninkrijkszaken ta un tema hopi actual. Banda di Statuut cu ta regla e relacionan entre e paisnan den Reino tin Rijkswetten cu a cambia e relacionnan substancialmente y cu COHO y mas Rijkswetten e trend aki ta continua. E constelacion, supervision y cambio den reparticion di autoridad cu ta bin cu esaki lo wordo ilustra den e gastcollege aki.
Formacion ta esencial den e epoca di tanto reto. Di e manera aki Fundacion Digna Laclé-Herrera kier sigui brinda un plataforma na e mensahe cu hunto nos mester hisa e nivel di politica na Aruba. P’esey e lema di e curso di formacion politico, expresa na Hulandes, ta keda: “Ambieer niet een functie, maar de kennis om die functie te kunnen vervullen”.
Tur cu kier duna un aporte na e causa publico ta keda cordialmente invita. Pa inscripcion por acudi na Cas di Partido y cuminsa participa na e curso diahuebs 24 di maart 2022. Pa mantene e curso mas accesibel posibel ta pidi un contribucion chikito di Afl. 50,-. Material di e curso lo ta gratis.
