Suzette Kock a fungi como Presidente di Hunta di Directiva pa Fundacion pa Hende Muhe den Dificultad, awor Fundacion Contra Violencia Relacional desde 2016 pa 2020. Suzy ta un abogado na e bufete di Ancora Legal y a sirbi 4 aña na cabes di nos Fundacion.
Sra. Suzette Kock, ta un lider cu hopi curashi y pasion pa logra varios cambio positivo, hunto cu e team di e Fundacion. Entre otro, a introduci e “Orange Aruba”, cu a nace di un campaña anual di Nacionnan Uni Hende Muhe “Orange the World” na unda ta tene 16 dia di activismo contra violencia contra hende muhe y ta conscientisacion na e comunidad encuanto di violencia.
Den su presidencia, nos Fundacion a realisa e introduccion di metodologianan den guia pa victimanan di violencia, pues e clientenan di FCVR. Hunto cu e demas miembronan di directiva di FCVR a reconoce e necesidad, pa cuminsa trata y guia tanto e muchanan como victima di violencia relacional. Un otro aspecto cu ta reconoce ta e necesidad pa cuminsa cu un ayudo pa e abusador den un violencia relacional.
Na momento cu Suzy Kock a realisa cu Aruba no tabata cumpli cu e ‘Tratado di Istanbul’ ela cuminsa traha pa yega na mas lugar. Aruba tabatin unicamente 5 lugar pa shelter mientras e tratado ta stipula cu mester tin 1 shelter cla pa cada 10.000 habitante. Asina Suzy cu e cooperacion y asistencia di e coordinadora y directiva di nos Fundacion, a logra haya ayudo di CEDE, e Minister di Asuntonan di Exterior di Hulanda, y Gobierno di Aruba a realisa na final di e aña aki un shelter multifuncional nobo nobo cu 16 unit, na unda no unicamente nos ta cumpli sino surpasa cu e rekesitonan di e tratado di Instanbul, creando e shelter pa hende muhe y muchanan di mas grandi di nos region.
Suzy Kock a aboga tambe pa nos Fundacion door di combersa cu entre otro Procurador General di e tempo ey na Aruba, Mr. Van Dam, pa introduci un instruccion [aanwijzing] pa con nos polis mester trata casonan di violencia relacional. Como representante di e Fundacion Contra Violencia Relacional a participa tambe durante su temporada na hopi conferencianan internacional encuanto di violencia relacional.
Fundacion Contra Violencia Relacional a asisti Minister di Asuntonan Social tambe cu e plan nacional di Aruba specialmente e parti di violencia relacional. Te asta por bisa cu nos Fundacion tabata un di e promenan den liña den formacion di un Socialcrisis Plan. E aña aki nos Fundacion a cumpli su 25 Aña di existencia y na e ocasion aki a cambia nomber di nos Fundacion pa Fundacion Contra Violencia Relacional.
Suzy Kock ta kere den nos causa y nos Fundacion, a inspira un y tur trahando pa hunto logra e metanan y traha cu un bista nobo pa futuro di nos Fundacion. Directiva y Personal di Fundacion Contra Violencia Relacional ta expresa nan palabranan di agradecimento na Suzette pa e bunita trabou cu ela haci pa nos Fundacion. Masha masha Danki y exito den futuro pa Suzette Kock.
