Diasabra awo dia 23 di maart 2024, Fundacion Bon Nochi Drumi Dushi lo tene nan prome evento pa e aña aki.
E evento aki, titula “Importancia di Lesamento”, lo tuma luga na Centro di Bario Dakota di 9:00 pa 11:00 di mainta. E actividad aki ta parti di un proyecto cu e Fundacion kier enfoca riba dje durante e aña aki.
“Nos meta ta pa expande y profundisa den e proyecto di lesamento cu un programa unda e enfasis lo ta riba participacion activo di mayor pa educa nan mes riba e importancia di lesamento y mientras cu nan ta haya e informacion necesario, laga e muchanan haya e oportunidad di experiencia lesamento di storia.”
E proyecto “Ban siña e importancia di lesa na tur Centro di Bario” ta dirigi na prome luga pa mayor, cu e meta di enfatisa e importancia di lesamento y siña mayor con por implementa esaki na cas.
Durante e sesion informativo aki, e mayornan lo siña diferente conseho y strategia di con pa implementa un rutina di lesamento cu nan yiu(nan) y con pa diversifica esaki pa e muchanan keda atento, motiva y inspira.
Esaki lo ta e prome actividad cu diferente profesional den e area di lesamento. Mientras e mayornan ta ricibi informacion, e muchanan lo haya e oportunidad pa haci cos creativo y pa scucha storia tambe. E meta ta pa mucha, a base di nan experiencia cu storia, buki of serie di buki, keda stimula, entusiasma y inspira pa crea nan mesun storia.
Ta invita tur mayor cu yiu di 4 pa 8 pa bin ricibi informacion importante pa desaroyo di nan yiunan door di lesamento y laga e muchanan pasa un rato agradabel trahando obra di man y scuchando storia.
