Fundacion Ban Uni man pa cria nos muchanan pa hopi aña ta yudando dunando desayuno pa e muchanan. P’esey mes a acerca sr. John Fun, mirando cu fin di aña ta acercando. El a splica cu nan a cuminsa na 2001 cu 138 mucha. Manera ta calcula, tin e aña aki nan ta existiendo 16 aña. A cuminsa e aña escolar aki cu 587 mucha. E fundacion a crece y el a logra di sobrevivi durante tur e añanan aki pasobra tin un necesidad den comunidad. E cantidad di mucha ta prueba esey. Tabata tin un tempo cu tabata tin hasta mas mucha, pero debi na falta di fondo, mester a reduci e cantidad di mucha.

E aña cu a pasa, tabata tin un aña hopi bon. Mester bisa cu tabata tin algun bunita donacion cu a haya y esey ta haci cu hasta a palabra den seno di e directiva, cu cuminsamento di aña lo acerca e sobra di scolnan cu no ta inscribi den e programa, pa wak si nan tambe tin mucha cu ta den necesidad.

Proceso

E fundacion ta percura pa e desayuno wordo entrega pa e di dos pauze di 10’or, pa e muchanan haya nan pan e ora ey.

E mucha mester su desayuno

Segun John Fun, esey tabata e prome reto y a lage den man di e maestronan di scol y e trahadonan social cu ta traha hunto cu e scolnan, pa nan screen e muchanan. Nan t’ey cu e mucha henter dia y nan tin un miho idea cua muchanan di berdad ta den necesidad. Esey a resulta di ta bon. No ta bay nenga cu den bes en cuando bo ta haya hende ta slip, muchanan cu ta wordo neglisha door di nan mayornan. E mucha tin hamber, si por yuda e muchanan ey tambe, asina sea y nan ta contento.

Kico ta e desayuno

E desayuno ta consisti di un sandwich. Ta percura pa e sandwich tin beleg riba dje, algo substancial pa yena e mucha su stoma y e ta haya un bebida. Normalmente ta sea un juice of un producto di lechi manera chocolade melk of un yoghurt drink.