Algun siman pasa tabatin un caso den corte di SVOA (Stichting Voortgezet Onderwijs) den cua a trata e “blunder” di parti di e fundacion. Segun a bin compronde, directiva di e fundacion a duna un empleado su retiro sin cu nan a cana e caminda legal corecto.
Aparentemente, SVOA a manda e empleado, trahando como Technische Onderwijs Assistant, un carta dia 28 di juni 2021 bisando e cu entrante prome di augustus ta dun’e su retiro. Motibo cu nan a uza pa hustifica dicho decision ta cu e empleado tabatin 588 dia sigui di AO, debi na malesa.
Nan a basa nan mes riba e Buki di Codigo Civil articulo 1615h, inciso 1, cu ta bisa cu e doño di trabou ta autorisa, si e periodo di AO dura mas cu un aña, pa finalisa un acuerdo di trabou. No obstante, e empleado a busca un abogado y a entama un caso contra SVOA, den cua e abogado a argumenta cu como su cliente no ta cay bou di e cuerpo di docente sino bou di e Landsverordening Beëindiging Arbeidsovereenkomsten, por dun’e su retiro solamente despues di haya permiso pa esaki for di e Director di Departamento di Labor.
A base di esaki, hues a bisa cu e empleado a entrega su obhecion na tempo y a dicta cu e mester haya tur su salario atras, cu 15% di interes riba dje ya cu SVOA no a pidi permiso di labor pa e retiro por ta legal. Pa clarifica e aspectonan tecnico di esaki, e abogado cu a representa e empleado, mr. Hose Figaroa, a splica cu e pregunta primordial den e caso aki ta cu si lo por considera e empleado aki como un maestra si of no.
Esaki debi cu ley ta prescribi cu den situacion normal, pafo di ‘ambtenarij’, pa kita un trahado bo lo mester un permiso di departamento di labor, si no tin motibo urgente. Ora cu tin esaki, por bay over na termina e relacion di trabou. E ley aki, regula den ley di retiro, ta stipula cu e ley no ta aplicabel riba maestro, Figaroa a splica. Pues, si bo ta un maestro, e dunado di trabou no mester pidi permiso pa duna un retiro. Den e caso peculiar aki, e empleado no tabata un maestro sino un asistente di esunnan cu ta duna les.
Pa un relato mas amplio, lesa bo proximo edicion di TREMPAN.
