STA a reacciona riba e sentencia caminda cu FTA a perde e referendum di AAA. Hose Figaroa, vice-presidente y abogado di FTA, a comenta cu a tuma nota di algun comentario cu lo tabatin den prensa door di presidente di sindicato STA, Diego de Cuba, riba e decision cu a cay di corte diabierna ultimo, den cual un cantidad di trahado di aeropuerto, 11 en total, a desolve nan relacion di trabao y a otorga nan un compensacion pa nan añanan di servicio.
Den esaki, aunke cu STA no tabata parti di e caso, cual, segun Figaroa. Un di e personanan involucra den e caso tabata un miembro di STA, cual STA pa su motibonan no a defende su miembro. Riba su mes ta un tiki straño cu e sindicato cu no ta envolvi den e caso mes, ta duna un comentario, pero lo tin e motibonan pakico haci esaki.
FTA kier a trece aclareacion cu de Cuba a trece padilanti cu no ta corecto. Un di e asuntonan cu ta papia di dje ta tocante di reorganisacion, unda cu e ta bisa cu ta un prerogativa total di un empresa. E ta duna e impresion cu como trahado ta na merced di un empresa na momento cu e dicidi pa reorganisa y esey ta totalmente incorecto.
En berdad un empresa tin e decision, si e ta bay reorganisa si of no, pero como sindicato ta esun cu tin e deber di vigila cu e reorganisacion ta bay na un manera obhetivo, na un manera husto, na un manera corecto.
Esey ta tarea di e sindicato y ta haya e impresion cu na cierto momento e rol di sindicalista y empresa ta casi cera na otro, unda cu ta crea e impresion cu como sindicato ta papiando den nomber di e empresa, cual, segun Figaroa, no ta na su luga.
Cu gerencia di un empresa ta dicidi cu nan kier reorganisa, ta nan propio decision, pero ta un tarea di un sindicato pa vigila e proceso di reorganisacion aki.
Den e caso di aeropuerto, specificamente, e criticanan cu FTA tabatin y te ainda tin riba henter e proceso di reorganisacion, riba henter e proceso di plan social, incluyendo e rol di sindicato STA den esaki, ta e hecho cu STA, na momento cu el a negosha, contrario na loke sindicato FTA si a haci, no a percura pa busca e informacion debido referente na e motibonan tras di e reorganisacion.
Esey ta sintie den e declaracion duna, unda cu e lider sindical aworaki ta bisa cu tin e sospecho cu e cos aki tabata existi for di hopi tempo caba y awor aki, gerencia ta probecha pa haci e reorganisacion aki.
Figaroa ta puntra si esey ta e caso, dicon STA a scoge toch pa hunga e wega sam sam cu gerencia di AAA.
