Sindicato ta keda importante. E tin derecho di existencia y den un sistema democratico, no ta solamente demoracia ta funciona na momento di votacion so cada cuater aña, sino como sindicato, segun presidente di sindicato FTA,
Hubert Dirksz, nan ta un partner den sociedad, tin un rol pa yuda cu e situacion di e trahado y di e pueblo tambe ta keda bon atendi cu ta percura e ora pa husticia social y mantene un calidad di bida.
Esey ta e prome rol cu un sindicato tin y p’esey mes, segun Dirksz, na momento cu un sindicato acerca un dunado di trabao pa su trahadonan bira miembro of reconoce cu e sindicato ta representa e trahadonan di dje, no mester ta un problema.
Pasobra ta keda partner, y pio si ta traha cu husticia. Si un dunado di trabao ta cumpli cu ley, e ta husto cu su trahadonan. Solamente e sindicato ta un garantia pa bo por sinta combersa.
Pero na Aruba ta considera cu nos tin turismo como e pilar economico mas grandi.
Turismo ta duna henter Aruba 80% of mas di e entrada y ta pone pan riba mesa.
Esey ta nifica cu tur loke ta pasa den turismo ta importante pa FTA y esey e miembronan ta mas of menos tambe 70 pa 80% ta sali for di e sector turistico.
Pa aña FTA tin un 15 contrato colectivo. For di e 15 contractonan colectivo aki, 8 mas of menos ta bin for di e sector hotelero, segun Hubert Dirksz. Kiermen ta haya pa aña sigur dos, tres of hasta cuater hotel cu tin cu negosha CAO. Tin hotelnan grandi y hotelnan chikito.
Tambe tin e parti cu ta cay rond, manera casino, restaurant cu ta hopi cerca e sector turistico, transporte y comunicacion, cu por bisa cu na Aruba e atencion den e sector aki, si conhuntamente mientras cu ta negoshando contractonan cu ta haya ta bayendo bon, pasobra tin bon contracto, aumentonan husto.
No mester lubida cu e relacion aki ta un relacion di confiansa. Pero e ta basa riba husticia, derecho y deber. Kico ta e debernan mas husto y kico ta e derechonan mas husto cu tin cu cumpli cun’e, cu no ta poni den ley. FTA ta atendiendo esey, cual ta bon. Pero mester atende tambe kico e sector aki ta duna, solamente pa awe, su garantia pa futuro. Es decir, e producto turistico, e servicio di nos propio trahadonan, e inversion den e companianan, e infrastructura di cada un di nan, e calidad pa no bende nos producto barata, pero tampoco no bende un producto cu nos no tin, Dirksz a enfatisa.
