Sindicatonan representando empleadonan publico ta den un lucha di algun luna caba pa yega na un acuerdo pa pago di indexering. Un herment pa compensa e perdida di poder di compra, cu a palabra den Protocol mas cu un decada pasa cu representacion di e ambtenaarnan. E sindicato FTA, cu ta e sindicato di mas grandi di sector publico, ta evaluando pa uni su mes na e lucha di indexering.
E motibo di esaki ta cu FTA tin mas cu 100 miembro, trahando den sector Gubernamental cu ta depende di e acuerdo aki. Esey ta e motibo cu a aserca diferente di e sindicatonan den e lucha pa logra sinta cu nan na mesa y mira con FTA por uni pa haci e lucha mas fuerte. Awo e siguiente paso ta pa FTA sinta na mesa cu tur e otro sindicatonan cu tin representacion den sector gubernamental. Hopi hende no tabata sa cu FTA tambe ta representa cierto cantidad di trahado den sector publico.
Dirksz a mustra cu e trahadonan a cay atras den nan entrada door di perdida di poder di compra y e indexering ta algo cu nan tin derecho riba dje. “Awo e lucha ta pa gana y haya bek loke a wordo perdi,” e sindicalista a comenta.
“Nos ta spera cu nos por haya otro entre e sindicatonan cu un pensamento fuerte, cu nos lo hiba pa nos miembronan pa sigui participa den e grupo di sindicatonan.”
E sindicatonan cu ta den lucha awo pa indexering ta: SPA, SIMAR, TOPA, SEPPA y SADA.
Den sector priva e tema aki hopi biaha ta wordo trata durante negociacionnan di CAO, aunke e no tin e mesun nomber. Ta papia mas bien di adaptacion pa compensa aumento di costo di bida. Ora cu no ta necesario ta laga esaki cay y ta negocia solamente e aumento di salario. Tin biaha e aumento general no ta suficiente, e ora ta uza e ahustacion di salario basa riba aumento di costo di bida.
Tambe el a bisa cu tin hopi trahado den sector priva cu salario abou y cu ta carece di e posibilidadnan pa haya adaptacion di salario debi na perdida di poder di compra of ni un simpel aumento no ta haya. Loke ta minimo pa un empleado ta e maximo pa nan. No ta haya ni bonus of dianan di vakantie. FTA sa di situacionnan na negoshinan cu ta draai bon pero ta paga su empleadonan menos bon. P’esey si empleadonan tin representacion sindical, nan lo por logra hopi mas. Principalmente esnan trahando den sector di turismo cu na opinion di FTA a bay hopi bon e ultimo añanan. “Si bo kier bo trahadonan funciona bon y aumenta productividad, trata nan bon,” Dirksz a bisa.
El a finalisa bisando cu e ta lamenta cu na Aruba leynan laboral no ta wordo respeta, manera e no cumplimento cu CAO cu ta trece hopi desconfiansa bou di e trahadonan.”
