Yegando mas cerca di formacion di un gobierno solido y cu mayoria den Parlamento, dialuna 30 di augustus e reunionnan cu stakeholders den comunidad a sigui cu formado Evelyn Wever-Croes y e ekiponan di partidonan MEP y RAIZ riba e temanan social y financiero. Si considera cu e reunionnan aki ta tumando luga pa dos luna caba, por conclui cu ya a topa cu 115 diferente stakeholders di Aruba, pa por duna informacion y participacion den e programa di gobernacion cu entretanto ta cla y firma caba.
Pa Fundacion Centro Pa nos Grandinan Kibrahacha, Director Jeffrey Matos a indica cu e nan ta satisfecho cu Aruba ta bay haya un minister pa atende cu e cartera di nos adulto mayornan. Esaki ta na beneficio di e grupo aki den comunidad. Den e reunion, Fundacion Kibrahacha a elabora riba e diferente proyectonan cu nan a realisa, cu tin den ehecucion como tambe e proyectonan cu tin den nan plannan. Un fundacion cu pa 36 aña ta brinda nos grandinan di tur districto na Aruba un centro di actividad ofreciendo servicio di transporte y hunto cu stakeholders ta organisa diferente evento di informacion riba diferente tema entre otro salud y technologia.
Julie Wever, Director Tecnico y Comercial di FCCA a presenta nan maneho y ideanan pa cu vivienda pa comunidad. Wever a expresa cu ta hopi duidelijk cu mester traha hunto riba diferente topico riba e parti social y con pa traha pa logra barionan cu ta fit den comunidad y cu tin tur facilidad den dje teniendo cuenta cu flora, fauna y medio ambiente y brinda pueblo casnan di calidad.
Pa Stichting Rancho, cu tin 11 aña di existencia, Clifford Rosa a elabora riba e programa Celebrando 200 Aña di Oranjestad cua programa a cuminsa aña pasa. Ta pidi colaboracion di Gobierno, departamento y stakeholders pa por encamina e programa aki te cu 2024. Conserva historia y cultura di Oranjestad, specialmente di Rancho, tabata un punto di enfoke. Ta pidi Gobierno pa pone mas atencion na e protocolnan di Unesco y riba e SDGs, specialmente number 17.
Pa APFA, Shelia van Veen, Director, a duna su declaracion na prensa bisando nan tawatin un bon reunion cu formado y ekipo na unda cu e delagacion di APFA a haya varios pregunta tambe di parti di e ekipo di formacion. APFA a duna un presentacion cortico y interesante tocante e diferente desaroyonan di e fondo di pensioen, splicando tocante e inversionnan y posicion financiero di e fondo. A elabora riba e tema di flexibilisacion pa brinda e participantenan mas scogencia den nan pensioen.
“Te aworaki nos a reuni cu 115 stakeholders. Cada un di e reunionnan aki tawata sumamente interesante na unda cu hopi puntonan importante a wordo treci padilanti. Ainda falta algun stakeholders pa reuni mientras cu e reunionnan cu e diferente departamento di Gobierno. Nos ta den e ultimo fase di formacion y pronto Aruba lo tin un gobierno solido pa e proximo 4 añanan. Mi ta gradici cada stakeholder y tambe prensa pa a duna di nan pa reuni cu nos y na prensa pa tur dia tawata presente pa e declaracionnan treci dilanti”, Prome Minister Evelyn Wever-Croes a duna di conoce.
