E representante di Ministerio Publico den e cas Dist (De Vuyst) no a mustra piedad cu Jairo Chalgut, mescos cu e no a mustra piedad di Sarahi Sierra y su famia. E no por a pidi nada otro cu bida largo pa e homber cu a daña bida di henter un famia, a laga un mucha di 2 aña sin su mama y a laga un hoben traumatisa pa e forma den cual el a bin haya su ruman sin bida den nan cas. E ta un homber perverso, Fiscal a bisa.
E representante di Ministerio Publico a tene cuenta con sinberguensa e acusado aki tabata. Despues di Sali di KIA tabata e famia di Sarahi ta esun cu a tum’e den nan cas pa e biba y come ya cu e tabata compaña cu mama di Sarahi. Y hustamente e homber aki dia 3 di november, 2017 a drenta e cas pa horta e 1100 florin cu e tabata sa ta eyden, pa su e ruman di Sarahi a conte di esaki.
Ora cu Sarahi tabata den e cas el a atake, a viole, lastre di un camber pa otro, unda cu despues cu el a golpia e hoben pa e no grita y e slanan na su curpa a demostra esaki. Durante un ora largo e hoben a lucha contra su agresor kende na final a mara su man y pianan, cu cu veter di un keds di e victima y despues a mara e man na e pianan pa e no por move di ningun forma.
Ademas, si esey no tabata suficiente, el a tapa su boca di bandana, despues a lora tape varios biaha pa wanta e boca tapa. Pa na final pone un saco di sushi riba su cabez, lora y pega esaki cu n kabel y tape na su nek. Pa sigura cu e no ta hala rosea el a stik y choke, Ningun piedad el a mustra.
Un situacion inhumano durante cual e hoben a lucha y sufri hopi; un situacion inhumano den cual su ruman chikito di 13 aña a bin haye aden y cu ta lage traumatisa pa resto di su bida.
Fiscal a papia riba con e sucedido a afecta henter e famia, mas pasobra e ta bin di un hende cu nan conoce. Como e agresor tabata un conoci di e famia, el a dicidi di kita bida di su victima pa e no wordo denuncia.
Loke cu a pasa dia 3 di november a pone cu e famia mester a bandona nan cas pa no biba e luga unda e bida di nan yiu y ruman a yega n aun fin tragico. Tabata imposibel pa nan sigui sigui biba den e cas unda tur cos a tuma luga y unda cu a descubri e curpa di nan ser stima di un edad asina hoben.
Banda di tur esaki, cu su actitud, segun e fiscal, e ta laga e famia cu hopi pregunta. Preguntanan cu e lo mester contesta y yuda e famia procesa e sucedido, pero hasta den esaki e no ta dispuesto. Un famia cu a tum’e den nan seno despues cu el a sali di KIA y a dun’e un dak y cuminda. Y husto esaki ta haci e sufrimento di e famia mas grandi.
E actitud di e acusado durante henter e investigacion y den Corte, ta duna e impresion di un homber sin escrupulo y sin piedad cu solamente ta tene cuenta cu su deseonan perverso riba bida y bienestar di otronan. Na niun momento el a tuma responsabilidad pa su hechonan y no tabata habri, pero tampoco a mustra remordimento.
E hecho aki ta algo cu a shock comunidad, cu no por kere cu algo asina ta posibel na Aruba: morto di un muhe hoben di dia cla den su mesun cas.
Reclassering a evalua e acusado y nan ta kere cu tin hopi chens cu e por ripiti algo asina y a pidi pa laga un Psycholoog haci un evaluacion tambe di e acusado. E ultimo aki a bisa cu no tin indicacion di un problema di desaroyo of problema di personalidad. Pues e ta completamente responsabel pa su actonan. E Psycholoog tambe ta kere cu e chens pa ripiti un crimen asina ta hopi halto. Den e caso aki TBS ta descarta mirando cu no tin nada cu ta strobe di para responsabel pa su actonan.
Loke ta remarcabel ta cu e acusado a nenga ayudo pa kita di su drogadiccion.
Tambe Fiscal a bisa cu e procesverbaal ta mustra cu ta trata aki di un adulto cu cada biaha ta bira mas manipulativo y mas violento, sin ningun misericordia y cu ta actua manera un “roofdier”. Despues di sali di KIA el a cuminsa un relacion cu mama di e victima. Mientras e famia a tum’e den nan seno y biba na nan cas, el a cuminsa un relacion intimo cu un otro yiu muhe di 14 aña y a seducie entre otro cu droga. Na final el a viola y mata e yiu muhe mas grandi di e famia. Banda di esaki, den e cas di e famia mes.
