Ministerio Publico a bay den casacion contra sentencia di Corte Superior di 10 di juli ultimo. Tres hues a condena e sospechoso Izaak Principaal (kende e tempo di e sucedido tabatin 17 aña di edad) entre otro, pa tira e mucha muhe Sayuri Petronia di 19 aña mata pa un castigo di 4 aña di detencion hubenil y imposicion di e medida “Plaatsing in een Inrichting voor Jeugdigen” (PIJ-maatregel).
Pij-Maatregel ta encera cu ta intern’e di forma obligatorio, pa e periodo menciona den un instituto na Hulanda. Despues di dos aña ta haci un evaluacion y mira si mester prolonga esaki. Ta scoge Hulanda, pa motibo cu ni na Aruba ni na Corsou tin un instituto cu por yuda hobennan.
Ministerio Publico a pone tata di e victima mortal awe na altura di nan decision, esta cu lo apela e sentencia pa mira si cinco hues na Hulanda por yega na un otro decision.
Den Prome Instancia Izaak Principaal a haya un castigo di 9 aña + TBS (na disposicion di pais), mientras cu fiscal a pidi 11 aña. Den apelacion PG a bolbe pidi 11 aña mas TBS pero e tres huesnan a dicidi pa dun’e yn castigo hubenil, cu e maximo ta 4 aña di prizon.
Cu e decision aki, Ministerio Publico ta purba haya rason cu mester trata e acusado como adulto y no como mucha, specialmente si mira su lista di crimennan cometi. Ta un hoben hopi peligroso cu ta un peliger pa comunidad y pa bienestar general. Si den casacion nan duna PG rason, e ora lo mand’e caso bek pa Corte Superior pa un reevaluacion. Si e Cassatie Rechter haya cu e sentencia duna ta masha bon, e lo declara e apelacion no-admisibel.
Pa e tata, Mike Petronia, esaki ta un logro grandi. E tin tanto tempo ta lucha pa su yiu haya un chens den corte, pa husga su asesino debidamente. Awo Ministerio Publico ta dun’e rason den su lucha y lo apela. Otro keho di dje ta relaciona cu e maneho slap di Minister Rocco Tjon, cu no ta capaz pa pone ordo y kita arma for di caya. A mir’e cu e ta hunga politica, ata ayera nochi un otro hoben, mama di dos criatura, ta perde su bida inocentemente door di un drive-by shooting. Ta sinti cu e situacion no ta mehorando sino empeorando!
