E rapport traha pa dos agente policial, unda cu ta para cu e homber Juan G. lo a purba di mata nan, no a convence ni Ministerio Publico ni hues pa tene e homber cera. Consecuentemente a declar’e liber, desbaratando asina e rapport traha.
E caso a tuma luga dia 6 di mei ultimo, ora cu e dos polis di inicial B. y K., a para e chauffeur pa un control. E situacion ta parce, segun e rapport traha, cu e homber no kier a coopera cu nan.
Polis a sinti nan mes menasa pasobra e sospechoso a manda e auto riba nan cu un velocidad halto, pa cual nan mester a maniobra pa e no alcansa nan. Y pa colmo, segun e rapport, despues di e sucedido a dicidi di deten’e, pero e chauffeur no kier a coopera.
Fiscal a splica cu el a bay analisa e rapport traha, a base di cual a traha e acusacion contra Juan, pero e mester a bay busca mas prueba. Asina a dicidi di analisa videonan den e area unda e hecho a tuma luga. A analisa e filmacion varios biaha y ningun caminda por a constata cu e auto tabata bin rib’un velocidad halto y a bay riba e polisnan.
Parce cu e polisnan no por a prueba tampoco cu nan mester a bula na banda pa scapa nan bida. Riba e mesun video por a mira momento di detencion y aki tampoco por a nota cu e chauffeur a resisti of a haci movecionnan den e direccion aki.
A menciona tambe declaracion di mas hende na e sitio cu a indica cu nan no a mira e chauffeur resisti contra su detencion. C’un escenario asina, fiscal a bisa hues cu e no por haci nada otro cu pidi pa declara e homber liber di e acusacionnan.
Hues na final tabatin e mesun impresion cu fiscal y a bay di acuerdo cu e peticion di Ministerio Publico pa declara Juan liber. Ki consecuencia esaki lo tin pa e dos polisnan no ta conoci. E trayecto aki ta penal, pero awo lo sigui e trayecto disciplinario pa saca afo dicon e polisnan a gaña den nan rapport, purbando pa cera un ciudadano creando un scenario cu no ta existi.
Hues y fiscal mester por confia 100% riba veracidad di rapport di polis. No por ta asina cu un polis, bou huramento, ta skirbi un rapport y despues fiscal mester bay verifica si locual a skirbi ta berdad. Y pa colmo a constata cu nan a gaña of altera e sucedidonan. Den otro casonan similar polisnan a yega di perde nan trabou, pa falta di integridad.
