FCCA, ta un fundacion cu ta dedica su esfuerso riba solucionnan pa e falta di casnan social na Aruba. Nan meta ta pa tur famia Arubano, particularmente esnan cu ta enfrenta retonan grandi pa haya un cas, por conta cu un hogar. Pero nan vision ta bay mas leu; FCCA ta traha activamente pa mehora e calidad di bida den nan barionan, y pa organisa actividadnan cu por enrikece e bida di su residentenan den un manera sostenibel.
Den cuadro di e evento di Aruba Doet rond Aruba, unda ta haci algo pa comunidad, FCCA a yuda guia grupo di studiante di Universidad ehecuta cuater proyecto pa bario. E tres studiantenan di Universidad di Aruba: Ronan van Putten, Isamae Solognier y Salem Auguste, ta contento di por a traha hunto cu FCCA riba un proyecto dirigi na e habitantenan di Bushiri Residence.
E studiantenan aki ta di curso di Project Management, y nan mester a lant’e for di nada te na ehecucion di loke nan a pone riba papel. Den e proceso, hunto cu FCCA, a siña cual ta e prome pasonan pa tuma, y pone esaki den un plan cu mester bay segun schedule. Incluso a traha un Plan A y B, por si acaso algo bay malo. “Tur cos a bay bon y awe e tabata un evento sano… e hendenan a keda masha contento cu e evento. E meta tabata pa nos haci algo positivo pa comunidad di Bushiri y nos a logra,” e studiante Salem Auguste a comenta. E experiencia similar a ser comparti door di Ronan van Putten.
Ambos ta siguiendo nan estudio na e facultad di OGM (Organization Gouvernamental Management). “E proyecto a siñami e importancia di ta uni. Trahando cu diferente fundacion a bini hunto pa haci algo bunita pa comunidad.” Solognier, cu ta asisti na e facultad di Social Work & Development y ta pasando su periodo di stage na FCCA, den e departamento di Woon- & Wijkbeheer, encarga cu e mantencion di e calidad di bida di e barionan di FCCA y su habitantenan, a splica cu tabata tin cuater proyecto planea y ehecuta riba e dia ey, tur door di studiantenan di Universidad di Aruba.
Proyectonan a inclui limpiesa di bario y creacion di un area recreativo na Kiviti, un feria laboral y di educacion na Bushiri, y accionnan di limpiesa na Village. Pa e habitantenan di e Tanki Leendert Complex a tene un evento social cu actividad pa tur edad.
Tur e proyectonan aki tabata bou guia di un grupo di beheerconsulenten, manera Rachel Murray, di e departamento di Woon- & Wijkbeheer di FCCA. E funcionarionan aki ta enfoca riba contacto regular cu e habitantenan y yudansa pa mantene un vivienda placentero y comodo, como tambe percura pa cumpli cu e reglanan di FCCA. E beheerconsulenten di FCCA tambe ta yuda interveni den asuntonan social, promoviendo colaboracion y contacto cu e instancianan relevante.
E studiantenan merece un gran elogio pa nan esfuerso admirabel den e proyectonan aki, cu a contribui di forma significativo na e bienestar di e comunidadnan.
