Normalmente FAVI a tene un dia di entrenamento cu su clientenan na Eagle Beach. Sinembargo e biaha aki ta uno special, mirando cu dia 15 di october ta dia Internacional di Garoti blanco cu strepi cora, ta haci extra actividad pa e clientenan por sigui mobilisa, uza nan garoti, train cu esaki.
E no ta nada fuera di normal cu ta haci. Ta haci esaki tur siman cu nan training di gym, pero awe specificamente cu canamento cu e garoti.
Naftali Koolman, cliente di FAVI, ta conta cu ta prome biaha cu e ta bay na Eagle Beach y ta un reto. E mes tin casi tres aña ciego y ta uzando e garoti blanco cu strepi cora. Ta algo cu tin cu custuma cu ne. Mester keda constantemente train pa por gara e triki di uza e garoti.
Setty Baarh, directora di FAVI di su banda ta conta cu e training no ta algo for di normal. Tur siman e clientenan tin nan training, pero awe specificamente nan tin e canamento cu e garoti.
Tin diferente caminda cu e clientenan ta bay, sea ta cana na Eagle, of cana riba Linear Park. Hasta nan ta bay Jamanota p’asina nan conoce diferente obstaculo. Tambe ta siña nan resolve problema ora cu nan haya obstaculo. Esey t’e meta.
E meta pa cana cu e garoti blanco cu strepi cora, ta pa nan siña bira independiente primeramente. E garoti ta un simbolo di independencia y esey ta loke kier enfoca riba dje. No solamente p’e persona cu ta completamente ciego, pero tambe p’e persona cu tin un bista limita. E garoti aki ta laga hende sa cu e persona tin un problema di bista y pa tene cuenta cu ne tambe.
Pa cobertura mas amplio lesa edicion di TREMPAN mañan.
