Ta for di diasabra anochi cu famia a bati alarma pa nan ser keri cu ta perdi. Ta trata di Señor Blijden, cu ta sufri di alzheimer. A pasa henter un weekend di buskeda pero sin resultado. Netamente dialuna mainta a drenta un bon noticia cerca famia.
Caminda un ciudadano di Fortheuvelstraat cu ta cana frecuentemente den Sero Colorado a bin topa cu Señor Blijden. Pero, e situacion ta peculiar mirando cu for di ayera e dicho ciudadano a mir’e pero no tabata sa cu e tabata perdi. Ta apenas dialuna mainta cu el a mira 24ora.com y nota e noticia cu Blijden ta perdi. El a sali mesora bek y a topa cu Blijden drumi den un mata di hubada. Su lomba tabata tur na sumpia di hubada y tuna. Pero, pa a yega na Blijden, tabata dificil mirando cu e mondi tabata cera cu hopi mata di hubada y tuna.
Locual a resalta ta e trabou excepcional cu polis a haci. E polisnan di districto di San Nicolas y K9 a practicamente uza nan curpa como truck pa por rosa y yega na Señor Blijden. A pidi refuerso di demas polis, pa cual a yega cu machete y shovel. Mirando e tempo, no por a keda warda riba brandweer. Nan mes a habri caminda cu machete y shovel p’asina e paramediconan di ambulance por cana bay cu Blijden na ambulance. Despues di mira e raportahe riba 24ora.com, famia mes a presenta na sitio. Cu awa na wowo a gradici tanto e polisnan como e ciudadano di Fortheuvelstraat pa tanto e rescate y pa localisa nan ser keri. Sigur, un bon cooperacion y ta di admira e trabou haci.
