Dia 4 di december, 2022, un hoben di 17 aña a tira Anthony Carti mata. E fayecimento di Carti no solamente a trece gasto pa e famia pero tambe nan a sufri daño emocional.
Tur persona cu bira victima un delito por haci un demanda, durante tratamento di e caso. Pero e suma cu ta otorga ta limita. Pa sumanan mas grandi, por bay den caso civil.
Den e caso specifico aki por a haci daño pa e aspecto material. Den e caso aki a papia di e gastonan di entiero, paga door di rumannan di e victima, y cu ta riba 11 mil florin.
Pero tambe pa e yiunan di e victima a pidi un suma di 150 florin pa luna te ora cu nan cumpli 18 aña. Ta trata di 4 yiu. Pa nan alimentacion te cu 18 aña, segun loke cu e tata tabata contribui cu ne mensualmente, ta papia di rond di 45 mil florin.
Banda di esaki por haci tambe un demanda pa daño inmaterial y esaki mester hustifica splicando con e sufrimento tabata. Un di e puntonan cu abogado mr. Vito Carlo a trece dilanti ta cu hendenan a filma e victima agonisando y esaki a bay rond Aruba. Inclusivo e 4 yiunan a haya esaki pa mira. A base di esaki a pidi un suma maximo di 50 mil florin pa cada uno pa daño emocional.
Dia di e sentencia lo informa si Corte a bay di acuerdo cu esaki of no. E sentencia ta dia 14 di juli awo pa 8.15 di mainta.
