E noticia publica riba supermercado Lee Feng y asunto di BBO, tin basta doño di supermercado preocupa. Nan ta expresa cu nan ta respeta ley. E control ta algo na su luga y pa hopi tempo el a sosode. Solamente nan tin miedo di mal publicidad pa falta kizas di miho comunicacion entre Supermercado y e Departamento di Asuntonan Economico.
Supermercadonan ta haci nan best pa no desvia di e prijs di Gobierno cu ta cay den productonan controla. E problema aki ta mas grandi cu hopi ta kere. Doño di Supermercadonan a expresa cu nan ta haci pedido na agencia por ehempel y algun agencia ta pone e prijs cu e producto controla mester wordo bendi pasobra ta prijs di gobierno.
Tin Supermercado ta hinca e BBO mesora aden y esey ta e prijs. Otronan ta bisa cuanto e mester wordo bendi, pero no ta specifica si esaki tin BBO aden. Na caha hopi biaha e sistema mes ta hinca e BBO aden.
Na Lee Feng tabatin berdad un situacion unda tabatin algun producto cu no tabata klop 100% cu e prijs cu e empleado controlador a bin cune. Parce tin varios supermercado cu ta haya e lista di cambio. Asina mes tin hopi supermercado no ta haya e lista di prijs ora haci cambio.
Den e caso di Lee Feng esey tabata e caso. Parce cu a yega di notifica e Departamento cu ta controla un notificacion y nan email pa manda cada biaha e lista ora haci cambio. Tin biaha prijsnan ta subi y e supermercadonan no ta hisa e prijs. Ora e prijs baha nan ta baha pa cumpli cu ley mientras a paga otro prijs halto pa e producto na agencia. Hasta e prijs controla indica riba recibo di agencia, abou na e total ta bolbe cobra BBO y BAZV como agencia.
Sin bay den cualkier confrontacion, comerciantenan doño di supermercado ta bogando pa un miho comunicacion. Loke a pasa na Lee Feng por a wordo evita berdad y esnan di Lee Feng mes no kier pa esaki ripiti pasobra nan ta respeta ley. Nan no a haci nada intencional. Pa colmo atardi, despues di e control mainta, nan a haya un carta di advertencia di e Departamento. A mustranan unda nan a faya a base di loke a wordo constata cu no ta klop cu prijs di gobierno. Asina mes den e lista cu nan a manda cu cambio di prijs, ta mesun cu loke tin tambe den e Supermercado. A duna advertencia pa un prijs cu no ta klop, pero e lista cu nan a manda via email cu 11 vel di papel ta mustra e prijs cu Lee Feng tin riba reki. Cu otro palabra tin cambio den prijs, pero e Departamento mes no ta update nan lista cu mester wordo manda pa e Supermercadonan.
Pa aclarea tur cos, ta importante pa e Departamento di Asuntonan Economico, Agencianan cu ta bende producto controla pa gobierno y tambe Supermercadonan reuni. Asina traha un liña di comunicacion y den futuro evita e problema manera a sosode cu Lee Feng. Na caha mes productonan cu tin BBO inclui no ta cobra extra BBO. E ta hinca den e sistema. Cu algo a bay robez, nan ta compronde segun propietarionan di Lee Feng, pero kier evita esaki pa futuro. Algun dia pasa algo similar a pasa na Noord y e cos aki no a haya publicidad.
Lee Feng Supermarket ta lamenta loke a sosode cu nan pasobra nan tin un clientela grandi cu nan ta stima masha como famia. Cu nan ta cobra dobel BBO riba tur producto di Gobierno no ta klop y loke a pasa ta un eror cu nan no kier pa ripiti.
