Pa stimula economia di Pais Aruba, Exprodesk tin e proyecto ‘Empowered Women Exporters.’ Esaki ta un proyecto cu a cuminsa na december 2019 cu e meta pa empodera y guia e hende muhe na Aruba pa haci negoshi exportando nan producto y/of servicio.
Incubadora special pa fomenta talento femenino
Un grupo di comerciante femenino cu a participa na e tayer di Exprodesk, ‘From Zero to Hero, Mastermind – Empowered Women Exporters,’ facilita pa Taiana Mora di Nex Consulting, a dicidi di forma un aliansa strategico pa intercambia conocemento y yuda otro cu diferente proyecto pa asina por exporta nan producto y/of servicio.
Di e manera aki a nace un incubadora special pa fomenta e talento femenino di Aruba. E grupo di ‘Empowered Women Exporters’ ta consisti di Valeria Gomez di Vadavas, Sharina Gumbs di Studio Gumbs, Vanessa Hollander di PressPlay VDH Caribbean, Virginia Rasmijn di Stage 2 Inspire, Osyth Henriquez di Aruba Ocean Villas y Suzy Maduro di Suzy Maduro Consultancy.
E grupo ta reuni tur luna pa intercambia experencia cu otro.
Tuma contacto cu Exprodesk Minister Xiomara Maduro kier encurasha specialmente e hende muhe comerciante di Aruba pa haci uso di e servicionan cu Exprodesk di DEZHI ta ofrece. Ademas e mandatario ta gradici tur participante di e incubadora ‘Empowered Women Exporters’ pa nan iniciativa pa sostene otro den e mundo di negoshi y exportacion. Pa mas informacion bishita www.exprodesk.com of tuma contacto via 521-2400.
