Dia 6 di december e apertura oficial di e exposicion “Fissures” di artista local Belinda de Veer a tuma luga na Museo Arqueologico Nacional Aruba (MANA) den aire libre. Cu e monumentonan di Famia Ecury como decor, publico presente a goza di declamacion di poemanan di Nydia Ecury door di Ferdinand Franca y canto di Angela Croes di “Barro Tal Vez”. E exposicion cu su tematica profundo y comovedor a capta e atencion y a ser reconoci pa e prome bishitantenan. Publico general por sera conoci cu “Fissures” na MANA, entre 9.30or di mainta pa 4.30 di atardi di dialuna pa diabierna y entrada ta gratis.
MANA ta ofrece dos anochi special cu e artista Belinda de Veer y e curator Renwick Heronimo kendenan lo duna guia di e exposicion “Fissures”. Un lo tuma luga riba diahuebs dia 16 di december y e otro riba diahuebs dia 6 di januari di 7’or pa 9’or di anochi.
Den psicologia ‘catarsis’ ta ensera e proceso terapeutico pa purifica frustracionnan, emocionnan negativo y conflictonan pa nos no keda stagna den esakinan. E ta un manera pa ventila emocionan negativo pa duna espacio pa un estado di animo mas positivo y saludabel. Creando e obranan di arte, Belinda a pasa dor di un proceso di ‘catarsis’ y asina ela procesa situacionnan dificil y doloroso cu ela confronta den ultimo añanan. E situacion di Covid-19 ta hasi e exposicion aki uno hopi actual y relevante.
Simultaneamente tin e obra di arte impresionante di e artista Velvet Zoe Ramos, ‘Untitled’ di e serie ‘navegantenan“, riba e di dos piso di e exposicion permanente di MANA. Tambe tin ainda e exposicion fascinante “Di Tera nos ta bin y di Tera nos ta bai” di ceramista Trudy Lampe. Haci uzo di e oportunidad pa mira e obranan di artistanan local cu ta temporario na MANA.
Salanan di exposicion di MANA ta habri den luna di december di dialuna pa diabierna cu excepcion di dianan 24 y 31 di december y dianan di fiesta. MANA ta situa na Schelpstraat 42 den e compleho di edificionan historico y moderno. Sigui MANA riba su paginanan di Facebook, Museo Arqueologico Nacional Aruba y National Archaeological Museum Aruba pa mas informacion.
