Dialuna ultimo a tuma luga un lectura hopi importante riba oceano y lama den aula di Universidad di Aruba, unda cu e orador principal ta dr. Cesar Toro, kende ta un experto internacional di UNESCO/IOC.
Durante e charla a toca e siguiente puntonan:
– Proclamacion di Nacionan Uni riba e Decada di Ciencia Oceanico pa Desaroyo Sostenibel (2021-2030);
– E importancia y peliger di lama pa islanan chikito;
– Hende y lama – cambio climatico, polucion;
– Lo a duna tambe UNESCO/IOC su punto di bista riba e importancia di planificacion maritimo y parkenan marino;
– E importancia di UNESCO/IOC su trabao mundial pa loke ta oceanonan;
– Lo duna un bista riba e designacionan di UNESCO pa areanan marino [WH, MAB].
Profesor Boei Marchena tabata tey presente durante di e charla aki.
E mes ta consehero di destilacion sostenibel na WEB y tambe e ta duna les na universidad di Corsou. E ta hoogleraar di leerstoel di UNESCO.
El a conta cu e charla aki tabata hopi importante. Dr. Toro ta un experto reconoci riba e tereno di cambio di clima y tambe pa cuido di nos oceanonan.
Pa Marchena tabata hopi interesante, pasobra e kier incorpora ecohidrologia den full e ciclo di awa pa loke ta su leerstoel. Di e banda ey tambe tin e aspecto di agricultura sostenibel y tambe proteccion di ecosistema di marina costera, cu ta hopi importante.
Durante di e presentacion, dr. Toro a enfatisa cu pa un desaroyo di un pueblo y un pais, ta awa y energia bo tin mester. Awa ta esun di mas importante, pasobra awa ta bida.
Esey ta ripara cu hopi hende te ainda ta tume, vooral na Aruba, manera a custuma cun’e. E tey.
Pero awa hopi biaha, si nos wak nos historia, a contamin’e masha hopi mes. Poco poco nos a perde balor. Bo habri e cramchi e tey. Pero antes, prome cu Aruba a desaroya asina hopi, awa subteraneo, awa di den tanki tabata ta esunnan cu tabata tin.
Hende tabata tin mas balor pa su naturalesa. Awendia, hende ta bebe awa for di boter di plastic y despues ta bent’e awo, sin realisa nos mes ta contamina nos naturalesa.
Wak nos rooinan y tankinan, cu tempo aya tabata fuente pa awa, nos ta benta hopi sushi den dje. Nos a bira lomba pa naturalesa, segun profesor Marchena.
Consehero di Ministerio di Enseñansa, Ciencia y Desaroyo Sostenibel Marck Oduber tambe tabata tey presente durante di e charla na Universidad di Aruba door di dr. Cesar Toro.
El a comenta riba e puntonan cu dr. Toro a trece dilanti durante su charla. E puntonan treci p’adilanti tabata tin su importancia, segun Oduber, cual e orador a sa di detaya e puntonan aki den su presentacion.
Oduber tabata tey como experto den e parti di ciencia y ta vicepresidente di IOCarib. E ta representa e islanan Caribense pa IOCarib, esta e islanan chikito pa e region Caribense.
Otro aña lo tin un conferencia grandi na Aruba, caminda cu expertonan cientifico di nivel halto lo bay duna charla. E conferencia aki ta habri pa publico.
Tambe lo bay tin delegadonan di e region Caribense, Sur y Central America y parti di Norte America, Marck Oduber a splica.
