Ayera partidonan politico MEP, AVP, RAIZ, UPP y fraccion independiente di Daphne Lejuez den Parlamento a sigura nos cu tin expectativa grandi pa e reunion di awe. Minister Marisol Lopez lo defende su maneho contra e peticion di e fraccion di POR cu algun siman pasa a bisa di lo pasa un mocion di desconfiansa contra nan mesun minister.
“Den 15 aña cu mi tin den parlamento, ta prome biaha mi ta experencia algo asina, esta cu un partido ta kita confiansa riba su mesun minister”, asina mr. Juan “Ady” Thijsen, presidente di parlamento, a bisa ayera tardi den un entrevista exclusivo na 24ora.com. E reunion lo start 9:00am y no tin ora di caba. Contrario cu e prome rond, den e di dos rond parlamentarionan tin solamente 10 minuut pa hiba discurso. Despues e minister lo bin bek na palabra, parlamentarionan lo por haci un observacion final y despues votacion.
Interesante pa menciona cu te dia di awe, nunca mas e supuesto mocion di desconfiansa no a yega parlamento. Pues e motibo di e reunion mes no ta trata ainda. Y mirando cu e fraccion di POR a huma pipa di paz cu nan mesun minister, ta haci cu e chens pa dicho mocion subi mesa ta masha poco.
Di otro banda, e minister no a atende reunion di Conseho di Minister ainda, pasobra e ta sperando keto bay riba un carta di despensa of “trek in” e carta cu 7 minister a firma algun siman pasa bisando cu nan no por traha mas cu ne y cu mester kita su cartera. Den conseho di minister, ora Andin Bikker a bandona reunion bisando cu e lo no atende ningun reunion mas den cual Marisol Lopez ta presente, tambe minister Dangui Oduber a vocifera e mesun cos. Parce cu Glenbert Croes y Chris Romero tambe ta pensa e mesun cos di dje. Pues, separa di POR, e partido MEP tambe tin trabou pa haci awo pa controla e daño cu nan tambe a haci na e relacion MEP-Marisol. De facto, casi por bisa cu coalicion a bin haya nan mes den un scenario di a bira “ingobernabel”.
Pa partido UPP, henter e asunto aki ta un berdadero show y pantomina. Booshi Wever no por compronde cu awo diripiente Minister Presidente no tabata sa cu tin corupcion den Serlimar. Wever a sigura cu personalmente el a manda henter e dossier di Serlimar y di DOW pa MinPres, copia di e keho cu el a entama contra Otmar Oduber na Ministerio Publico. Pues no por laba man awo.
Pa partido AVP, e reunion di awe ta bira mas interesante cu e prome, pasobra cu Otmar Oduber ta meti den corupcion ta conoci. Husticia ta acus’e di 9 acto caba y su caso ta bou investigacion. Pero e hecho cu tin posibel minister di MEP cu tambe no ta integro, ta bira interesante. “Nos tambe ta scucha hopi cos akifo pero ta minister Lopez so por confirma e fiesta cu tabatin cu tereno den gobierno”, asina Melvin Tromp a garantisa.
Daphne Lejuez mes lo no hiba palabra awe pasoba ya el a papia caba. E lo sigui e reunion di cerca depende con e desaroya, lo tin comentario na final. E tambe ta sorprendi cu MEP ta purba laba man awo y benta e asunto den scochi di POR. Lejuez a bandona MEP y bira independiente specialmente pa e asuntonan tumando luga den Serlimar y e posicion dudoso cu MEP a tuma e tempo ey. Pues e mas cu tur hende por bisa di a lesa documentonan cu ta mustra cu por lo menos tin asuntonan dudoso den Serlimar.
Partido Raiz, aunke pafo di parlamento ainda pero masha critico den media, ta haya e desaroyo positivo. Ursell Arends ta referi na e hecho cu parlamento ta hunga su rol di supervision y di control riba gobierno. Ta haci preguntanan critico y yama e minister aden pa responsabilisa pa su maneho y decisionnan. Pero un cos a sali afo sigur ta cu tabatin corupcion pisa den algun departamento di gobierno. Arends tambe ta masha curioso pa scucha kico nobo lo bin afo awe den e di dos rond di e reunion publico pa kita confiansa como minister di Marisol Lopez.
Mester menciona cu politica ta un arte, ta un wega di schaak den cual e hungadonan ta move pionnan segun strategia y bon pensa di antemano. Esun mester por premira movecion di e otro y prome cu e move, ya abo a haci bo movecion. Ta obvio e ora cu e fraccionnan cu ta forma coalicion a premira e wega aki completamente robes, pasobra ningun di nan a spera cu Marisol Lopez lo crece di tal forma riba nan cu awor tur atencion ta riba dje siendo e bon politico y tur otro parlamentario y minister ta sinta den e huki na straf, cu un percepcion cu sea nan ta corupto of a permiti corupcion, cu de facto no ta haci nan menos corupto tampoco.
Un cos ta sigur, pueblo ta sperando e reunion cu masha atencion awe. Exito na tue fraccion y laga nos spera cu na funak democracia y bon gobernacion por prevalece.
